May 1 nungi anogoshia gari totzü jenjang melenshitsü

New Delhi, April 12 (Agencies): International jenjang apir May 1, 2017 nungi tenzüka anogoshia petrol aser diesel jenjang melenshitsü.
Indian Oil Corp (IOC), Bharat Petroleum Corp Ltd (BPCL) aser Hindustan Petroleum Corp Ltd (HPCL) ama company tulutemi May 1 nungi iba project ya tamasa yimti pongu nung tenzüktsü.
Iba project ya Puducherry, Andhra Pradesh nung Vizag yimti, Rajasthan nung Udaipur, Jharkhand nung Jamshedpur aser Chandigarh yimtitem nung tama tenzüktsü, ta IOC Chairman, B Ashok-i metetdaktsü.
Tatemsabo anogoshia jenjang melenshiba inyakyimji linük nung aliba petrol pump ajak nung kongshitsü.
Ashok-i, “Anogoshia jenjang melenshitsüji takoktsü mapa ka lir, saka onoki mezüng ibaji tesem kar nung tama tenzüktsü. Ibaji inyaka shisadangba sülen onoki linük nung tanga tesemtem nunga inyaktsü,” ta metetdaktsü.
Jila mesüra yimti naprong nung petrol aser diesel jenjangji kasa dang asütsü, ajisüaka petrol pump kar nungbo jenjang tetsüngda tera aittsüa akok, ta paisa ashi.
Minister of State for Petroleum, Dharmendra Pradhan-i sangdong ka ajanga, “Totzü company temi yimti pongu nung pilot project tenzükogo. Iba sülen tanüngba linük tesem ajaklen koma asütsü’ar parnoki telemtetba agitsü,” ta metetdaktsü.
Taoba hopta, tesüsabuba jenjang reprangshiba sülen petrol litre nung sen 3.77 aser diesel litre nung sen 2.91 ajema liasü.