May 1 nungi beacon light memelatsü

New Delhi, April 19 (Agencies): May 1, 2017 nü nungi tenzüka linük Tir, Ato kilonser, Chief Justice aser Chief minister tem densema tongtibang nisungtem (VIPs) gari nung beacon light temerem amshiba memelatsü.
Beacon light temeremji rongdak (emergency) garitem aser enforcement agency tem gari nung dang melatsü.
Iba telemtetba ya putiotsü asütsüsa ka lir, ta shia Road Transport Union Minister, Nitin Gadkari-i, “Tashi alirtem aser tangartemi parnok gari nung light temerem amshiba atema nüburtemi mepelai liasü. Iba ya democratic telemtetba ka lir,” ta ashi.
Paisa, nisung aikati tim masüba nung asüküma red beacons amshir, ta ashi.
“Public hearing sülen onoki iba telemtetba benoka inyaktsü. Ajisüaka ni ajak dang item beacon ji peisasa agientsü mepishir,” ta Gadkari-i osangbener dang ashi.
Tongtibang ketdangsertem gari nung beacon light temerem mamshitsü atema Cabinet-i telemtetba agiba sülen Gadkari-i pa indang official garitem nungi light temerem agiena liasü.
Linük nung Aam Aadmi Party-i tama Delhi minister temi gari nung red beacons amshiba nokdanga liasü, iba sülen Punjab nung Amarinder Singh-i aniba Congress sorkar aser Uttar Pradesh nung Yogi Adityanath-i aniba BJP sorkaria peipei state nung red beacon nokdanga liasü.
Tanü Cabinet-i iba telemtetba agiba sülen Ato kilonser, Narendra Modi-i twitter ajanga, “India nunger ajakji kasa dang. India nunger ajakji VIP kaka lir” ta ashi.