May 23 sülen Assam-Meghalaya arrtsü atema olemteptsü

Shillong, May 16 (Agencies): Meghalaya aser Assam tsüngda arrtsü tebilemtsü atema olemtepji May 23, 2019 sülen ang tenzüktsü.
May 23 sülen state anaprong nungi chief minister tem külemi mener arrtsü dak sendakba tebilemtsütem lemsateptsü, ta Meghalaya deputy chief minister Prestone Tynsong-i ashi.
Tynsong-isa opposition Congress-i Meghalaya aser Assam nung küm aika sorkar ketdangsüdang iba tebilemtsü mekoktetba atema aitsü.
Meghalaya kübok Assam nung arrtsüa aliba tesemtem nung aser talisa Ri-Bhoi district kübok Balakhawa nung tensa mejungi akümba sülen Meghalaya sorkari Assam den olemteptsü mapa inyaker.
Tawa tu Hima Nongspung nung secretary Michael Warjri’er ki amak aser pa Assam police-i apu.
Iba tatalokba sülen chief minister, Conrad K Sangma aser home minister James K Sangma nati Assam chief minister den jembiogo ta Tynsong-isa metetdaktsü.
Iba tatalokba atema sasar aser Assam police-i Meghalaya police den asüngdangtepba sülen ang Meghalaya litsü nung nisungtem aputsüla, ta paisa ashi.
Balakhawa tesem nung Assam-i PMGSY lenmang yangluba atema Tynsong-isa ashiba agi “Assam sorkari Hima Nongspung dang idakji lenmang yanglutsü atema asüngdang aser Hima Nongspung-i ‘no objection certificate’ agütsü.”
Assam sorkari iba lenmang yanglutsü atema temelaba meshiba tetezüji iba tesem ya Meghalaya litsü nung lir. PMGSY ya Assam sorkar indang masü saka Central scheme ka lir, ta paisa shisem.
“Assam mesüra Meghalaya sorkartemi yangluaka, lenmangji nübortem ajangzüktsü atema yanglur” ta Tynsong-isa ashi.