May 25 & 26, 2018 nung Adianu T. Meren Paul, Lower P.R.Hill Kohima ajanga ABAM-i tamashi mapa sayur ta züluba nung, nia pa o nung semloka tera shisemer

~  S.Medem Kichu, Lerie Colony, Kohima.

Laishiba aser ken kaküt nung aibülena zülua aliba indang Media (Newspaper) ajanga nüpor den lemsatepba nung shinga tai mali. Iba yagi ABAM-a saksalem daktsür aser nüportüm aika dang iba ajanga Tsüngrem o nung tajangzük & temoatsü angur. Ibai ajanga nisung aika Tsüngrem o regular azüngtsü yimya akümba, otsü tejangja mangateti aliba angatetba, yamala osang tajung aika dang lir.
Saka iba ya joko Local Media nung adoktsü memelar ta ABAM-i shibangtsüogo ta Adianu T.Meren Paul Kohimai züluba nung ngua kanga dang aoksaogo. Atangji nung iba ya shidakba nung shibangtsür alinungbo nenoki kanga dang tamashi mapa ka inyakogo, kechiaser tanü asüngbo nüportüm Tsüngrem o angazükbaji T.V, Radio aser newspaper ajanga timba angazüker. Nenoki pulpit nungi agütsüba sermon agi dangbo meperir.
Aseni alima otsü züludangdangbo kanga dang kümdanga inyaker aser aibülena zülubaji kata mali inyakteter, kechiaser aibülenji ka danga lira otsüji tai akümer aser nüportümi magitsü ta aseni meteta lir.
Saka kodang Laishiba aser ken kaküt yanglushidir, mekümdangi züpazüpa-a dang inyaker aser aibelen aika dang alir. Itümji kodang nüportümi bushiteta sayur, idangjibo aibülentsüji meimchir yimya nung tümpongdaktsür. Iba yimya ya joko melenshitsüla. Taoba mapang aibülena zülua aliba correction masür, anu shidak zülua aliba ang aibülena zülu süra, Revise asüba tetezü tejangja madoker.
Ibai ajanga adianu aika Tsüngrem o nung temoatsü angubaji telephone, tepang agi aser Media ajanga kü dangbo aikato shiogo. Kar-i nai aibülena aliba correction sütsürang ano iba indang rasa a ashiba ajanga ni otsüji shidak metetogo ta, ano kar-i nai ashiba ya shidak asü tai ar angatetsü atema bushiba ajanga nai laishiba teti azünger ka kümogo. Kanga dang pelar ta ashi.
Ano Nisung katibo pai niji kodanga mangudang aser paji Kohima nung aliba nisunga masü. Saka kü article ya azüngba ajanga temoatsü anguba atema pa tepela senpet kaküt ka bener yokba aji tawa to adianutsür ka ajanga kü nüm agütsü. Ni ibaji la nungi agizüka reprangdang nung kaküt tenüngji the Holy Bible Mirror ta zülur liasü. Iba senpet anguba atema nia kanga dang pelar.
Yamaji adianutüm aikati ano maneni bushiteta adokdakjang, itümji azüngtsü atema kanga dang yongyasita atar ta tawa to ang shili iba osang ya angashir. Ni bushiteta sayuba nunga nisung paikaji temoatsü angur süra ano adianu pai kati talisa, Kohima & Dimapur nungi bushiteta sayuba nung ano kwika temoatsü ngur alitsü. Nenokia, parnoki ashiba amaji, iba ya kanga dang junger, ano maneni bushiteta adokdakjang aser adokba shia onok (ABAM Office) dangia copy kaka yokang ta ashitsüba ang tim o lir.
Nenoki joko iba ya Local Media ajanga madoktsü ta ashir süra yasür bo nenok dangi (ABAM Office) dang yoktsü, saka taruba Revision nungjibo adianu Y.Imti Tzüdir, Dimapur-i ashiba amato aibülenji ka danga malitsüla (100% right).
Next Revision mapang nung iba yimya nung committee memberji shim nung tajung asütsü ta shidanger:-
1. Revision Committee memberji 50% Divinity & 50% Secular azüngertüm asütsüla. Iba indang ya ni taoba mapang nunga shiogo aser ano tangar-ia aikati membertümji temeyoktep asütsüla ta ashiba ngogo.
2. Ano nisung karbo tazüngba jenjang tajung akaba asütsü akok, saka Ao o junga memetet lira itümji magitsüla. Itümji shimok nungbo ano odangsa aibülenji adoktsü. Tatishitsü kar ni shidi:- (a) Kolosi 3:1 nung Nenok Khrista nung meso süra ta ang zülua lir. Yisu Khrista tasü nungi shia arubaji kar-i meso masü, Tsüngrem ain agi shia arudaktsü. Iba yagi sayur, tasü nungi shia aruba aser mesoba na differentiate masüteter. Mesoba süra alanga lia mesoba dang ajar. (2008, 2011, 2015 lir)
English laishiba aser Ao laishiba tejen Edition nungbo will become fresh water aser tzü temürük akümtsü ta ang zülua lir. (2008, 2011, 2015 Edition nung lir).
Yamala müsükba o jang aika dang tawa adokba laishiba nung ya zülusema lir.
Iba ocet azüngba ajanga nupor kar bosa Tsüngrem temaotsü angutsü ta amanga iba ocet tila ya adoktsür.