May 26 nü education policy tasenba metetdaktsütsü:Smriti Irani

New Delhi, May 16 (Agencies): Narendra Modi-i aniba sorkar küm ana ajungba mapang, talangka nungi yongya ata aliba education policy tasenba metetdaktsütsü, ta HRD Minister Smriti Irani-i shiogo.
Lai, “National Education Policy tasenba May 26 matongdang meteter alitsü,” ta NDA sorkar küm ana ajungba mapang IndiaTV den senden ka amendang ashi.
“Iba policy tasenba kübok, NCERT-i shisaluyim tsütsü timtem ajangshiba rangben tuteta ashitsü,” ta shia Smriti-i, kaketshirtemi Maharana Pratap otsü dang nungibo Europe nung atalokba Renaissance otsü ang temetetba, ta shisem.
UPA sorkari sorkar kaketrejutem nung kaketshirtem tamakok mongüdaktsüi temaba class-i aniketba (No-Detention Policy) tenzüka yutsüba inyakyima khen meyipa reprangshitsü aser tekaratiba nung telemtetba ka agitsü, ta laisa ashi.
Smriti-i, “UPA sorkari tenzüka yutsüba policy ya ajanga class 9 tonger kaketshirtem tsükdaka ayur. Anungji state sorkar temi iba policy ya agiendaktsüner,” ta ashi.
Board tatidang dena Class 9 nungi 12 tashi nung azünger kaketshirtem nem online ajanga angati kaketshisatsü agütsütsü atema IITs, IIMs, central universities, NITs aser nija universities kar teyari agia ‘Swayam’ ta tenüng agütsür inyakyim kar tenzüktsü sorkari inyaktepdar, ta lai ashi.
“Iba inyakyim kodang tenzükdir Board tatidang dena class 9, 10, 11 aser 12 nung azünger kaketshirtemi mobile app amshia India oshi ter nung online ajanga nüngdakba kaketshisatsü angutsü. Iba inyakyim taruba ita ana tsüngda tenzüktsü aser India nunger kaketshir shirnoki iba atema tenüng agütsüdir parnoki tatidang fee agütsüba dak alaka online ajanga angati kaketshisatsü ngutettsü. Ibai sensakertem asoshi maongka tulu lir,” ta Smriti-i ashi.
“Jammu & Kashmir nung kaketreju 24 tashi nung tesayurbo lir saka kaketshir maliba jangjaogo. Onoki state nung aliba kaketreju ajak kanga junga mitdar,” ta lai shisem.
Smriti-i nija kaketrejutem danga sorkar inyakyim den liromedemtsü mepishia metetdaktsüogo.