May aser Gulf linük lenirtemi Iran anemtsü nangzükteper

Dubai, December 07 (Agencies): Iran linüki tensa mejungi kümdaktsütsüsa mapatong balala inyakba anema nokdangtsü tezüngzüktep ka Britain Ato Kilonser, Theresa May aser Gulf Arab linük 6 nungi lenirtemi tanü, Bodbar nü agiogo.
Asetkong linük, Bahrain nung anogo 2 tashi agia, Gulf Cooperation Council (GCC) senden amenba sülen Kuwait, Oman, Qatar, Saudi Arabia, United Arab Emirates aser Bahrain nungi lenirtemi tan May den Iran anemtsü azüngashir lir.
Gulf linüktem talisa, Saudi linüki Iran-i Yemen nung sorkar anemertem den yaritepba aser Syria Tir, Bashar al-Assad-i aniba Syria sorkar pusema yariba atema tebilemtsü akatsü tenzüka lir.
Iran-i par mitkar tashi kanga sashia amshitsü tenzükba sülen par linük anemtsü aser par linüki bener arutsüba lendongtsüngdong nungi kümzüka alitsü nükjidong nung kidangsüa aliba GCC linüktemia pei mitkar tali tashi itshidaktsütsü tenzükogo.
“Iran-i Lebanon, Iraq, Yemen aser Syria densema, Gulf tesem nung tashiyim inyaka, tensa mejungi kümdaktsüba mapatongtem nokdanga anentsütsü atema asenoki tali lungjemshir inyaktsü nungdaker,” ta May-i tanü sangoktsü.
Iran-i nuclear tongpang osettsüset yanglutsü atema uranium tali bendentsü tenzükba maparen anentsü melena alimai par linük anema benokba tenokdangba sentongtem agientsü atema Iran den nuclear tezüngzüktep agir alima tashi abenba linüktem rongung Britain linüka densema lir.
Taoba 2015 küm Iran den nuclear tezüngzüktep agiba sülen Iran aser Britain nati par embassy tanaben tentetshiba den London aser Tehran na tsüngda British Airways tayimtsütema tanaben senzütsü tenzüka lir.