Mayakoya noksa nokdangba masü, saka shisaliok agütsütsüla

New Delhi, August 04 (Agencies): Linük nung mayakoya aser nisunger yimyatsüya bushisüngdanger mongtintemi, Centre sorkari mayakoya noksa website 857 shibangtsütsü mera ya kanga aritepa agiogo, mayakoya noksa website nokdangba ajanga masü saka India nunger lanurtem (arishi küm 13 nungi 19) nem mayakoya shisaliok (sex education) tajung agütsüba ajanga tashiyim amshia shi nung medemba mesüra tanur dak mapa tamajung inyakba nokdangtettsü, ta ashi.

“Mayakoya website tem nokdangba ajanga tebilemtsü mekoktettsü. Lanurtem nem mayakoya indang aser iba dak sentakba shisaliok agütsütsü asoshi tan tashi nung aliba sorkari inyaktsüla,” ta Mumbai nung alir Sexologist, Dr Prakash Kothari-i osangbenertem dang ashi.

Ano Mumbai nung aliba Nanavati Super Specialty Hospital nung consulting psychiatrist, Dr Madhuri Singh-ia, “Iba ya ajanga tebilemtsü koktettsü asü ka ratamata bilemer. Iba ya ajanga ozüng alema mayakoya DVDs shishilembaba buloa akümtsü. Iba ama tenokdangba ajanga mayakoya nung tejashiba aser iba dak sentakba tebilemtsü adoktsü südi,” ta ashi.

Aji oda süaka mongintemisa, tanur mayakoya noksabo khenyongi nokdangtsüla ta shiogo.

Fortis Hospital, New Delhi nung mental health & behavioural sciences Director, Dr Samir Parikh-i, “Alima ajunga nung tanur mayakoya noksa nokdanger aser internet nunga mesayur. Tebilemtsü kaji, taintem indang website kar nung tanur mayakokya noksa indang ‘link’ lir, iba asoshibo ozüng takhang agi nokdangtsüla,” ta ashi.

Dr Parikh-isa ashiba agi, “Sorkar, osangbenertem, social scientist tem, doctor tem aser tesayurtemi khuret süa, tashiyim amshia medemba ken otem ajema akümtsü asoshi tongtibangsüa ‘sex education’ agütsütsü atema  inyaktsüla,” ta ashi.

Taoba hopta telecom department-i mayakoya noksa indang website 857 shibangtsü asoshi tetuyuba agüja liasü, aser iba tetuyuba nung ajemdaker internet service provider temi mayakoya noksa indang website aika shibangtsüdagi.

Taküm July ita nung sorkari Supreme Court dang, mayakoya website tem shibangtsütsü atema akokba tashi agi mera ajak agitsü, talisa tanur mayakoya noksa nokdangtsü atema mera agitsü, ta metetdakja liasü.