Mayangnokcha Award küm 25 ajunger

Mkg. Oct.31 (TYO) : Mokokchung town nung maparen tapu balala nung inyaker tashitemetetter lanurtem rongnung kari apiteta class ter tatidang nung tematiba takok jenjang angurtem nem tesayur asür Mayangnokcha tenüng nung tenüngsang sempet agütsü tenzüker taküm 2018 küm agi küm 25 ajunger.
Iba sempet dang ya Mayangnokcha Awards for Academic Excellence ta ajar aser Nagaland Board of School Education-i agiba HSLC tatidang nung Nagaland nung alir Naga nungertem rongnung ajak madak tematiba takok jenjang angur nem iba sempet ya agütsür. Iba denji ano English, Ao, Social Science, Science aser Maths subject-tem nung mark teimtiba ngua takok angurtem nema kasa sempet agütsür. Item sempettem ajak nung sen den nüngo tajung renema agütsür.
Taküm iba Mayangnokcha Award Silver Jubilee sentong ya November 2, 2018 nü nikongdang 1:00 ako nung Mayangnokcha Higher Secondary School, Mokokchung nung alitsü renema lir. Iba sentong tulu nung tongti shilem agitsü asoshi taoba Chief minister aser governor, Wb.Dr.S.C.Jamir jaoka lir.
Iba sentong nung adentsü asoshi taruner tantsü tambu aser lanurtem ajak arua adentsü asoshi pelashishia jaoker ta Mayangnokcha Award Trust teloki metetdaktsüogo.