Mayangnokcha Awards

Naga nunger shisaliok nung anitetsang Mayangnokcha nüngden nung Nagaland Board of School Education kübok aliba school-tem nungi class 10 tatidang agütsürtem rongnung tematiba takok jenjang angur nem Mayangnokcha Award Trust (MAT) teloki  22 buba MAT Awards yashi agütsüogo. Iba awards ya NBSE ajanga agiba  class 10 tatidang nung tematiba takok jenjang angur (Overall topper) den ano English, Ao, Social Science, Science aser Mathematics subject-tem nunga tematiba jenjang angur subject topper nem MAT ajanga award agütsür. Tanü putu nung Naga lima yanglutsü asoshi inyakba mapatem rongnung iba MAT award agütsüba sentong ya ka asütsü. Mayangnokcha ya 1927 küm Cotton College, Gauhati nungi BA nung Honours dena agia renem aser Aor rongnung mezüng graduate asüsang liasü. Par mapang nung pa azüngba jenjang dak alang tulur mapa angutsü lenmang aisü liasü, saka pai item jenjang tajungji toktsür pei nübortem shiruru ama aliba jenjang nungi shisatenük lapokja yaritsüang mulungtet, anungji pai Impur Mission School nung tesayur inyaktsüang shimtet aser iba nung jagi Govt. High School Mokokchung nung Mezüngbuba Headmaster aküm. Aji oda, pa taküm tepiyong pai tesayur mapa inyaka Naga nunger anitet. Ibayongji pa 1988 küm February 29 nü iba lima nungi piladang, pai toktsüba senmangji kiojen aser alikimong masü saka Naga nunger kin ajak nungi nisung tajung, lenir aser tulur aika aniteta toktsübaji liasü. Atangji, tanü tashi Nagaland nung yimten, lokti aser arogotem nung taintem rongnung lenir kar danga lira, parnokji tesayur Mayangnokchai sayutetba purtem asütsü, Aji oda, pai inyakba mapatemji mesamadaktsüi pa ama Naga nunger lanurtem adoktsü aser lanurtem shisaliok bushiba maparen nung tajungtiba asütsü asoshi toktepdaktsütsü nükjidong nung MAT teloki Mayangnokcha nüngden nung iba award agütsütsü apitetba ya nisungba mapa aser tanü putu lanurtem tajung kümdaktsütsü asoshi sentong tapet ka yangluogo ta bilemer. Atangji, iba ama Aor tashitemetettertem longjemer Naga nunger lanurtem tajung nung toktepdaktsütsü asoshi inyakba mapa yagi Aor ajak tejak tentetter aser parnoki inyakba mapa tajungji Aor ajungai inyak ama akümer. Iba award ya Aor chanu nem dang masü saka Nagaland nung aliba Naga kin ajak asoshi renemtsüba sempet ka asünungji, iba ama mapa ajanga Naga nunger lanurtem meimtepa longjema alitsü asoshi putu tasen tajung ka yanglutsür asütsü. Asenok dak tashimait aika liaka ano tajung kaji asenoki tangara dena tajung kümdaktsüner. Iba jagi asenoki shisatenük mesakteti aliba kin aser nübortem aika nüchi kümdakja yariogo. Aji oda, tanüa tanü putu den apet MAT telok nung alirtemi pei nübo aser rongsen endoka pei shisatsü aser temetetba tajungtiba agi Naga lanurtem tajung kümdaktsütsü merangba mapa yagi asenok ajak tangar tsüngdang nümadangdaktsür. Iba jiluji ajizüka asenok nisung shia pei akok Naga nunger lanurtem jenjang jungdaktsütsü aser Naga nunger ajak kibong ka chir ama putepa alitsüsa mapa ka mesüra ka ajangabosa inyaktsü merangtsüla. Atangji, asenoki tarutsü limabo tanü lima dang nungi tajungba südaktsüner,  iba jagi tanü school azünger kaketshirtem anepalur. Aji oda, tanur ka tajung kümdaktsütsü asoshi asenoki inyaktsüba nüngdak mapa kaji parnok dang asenoki mapa tajung meranga inyaka sayutsüla aser parnok medemertemi meranga inyaker takok anguba otsütem ashitsüla aser parnok mapatemjia sayutsüla. Iba tangatetba nung Dimapur nung,talisa,tang class 9 aser 10 nung azüngertem dang Mayangnokcha award angur toppers tushiba aser award agizükba sayuba ajanga parnok ajungshitsü asoshi 2016 küm Mayangnokcha award angurtem tushiba sentong ya yashi Hokolbar nü Dimapur Mission Higher Secondary School nung liogo. Atangji, Naga lima kanga raksaogo aser iba teraksa yanglutsü asoshi Mayangnokcha ama pei kija akatsü aser ajangzüktsü mebilemi pei lima aser pei nübortem tajung kümdaktsütsü bilema inyakba Naga lanur ishika nüngdaker. Item  ama lanurtemji tang MAT ajanga inyakba sentong ajanga adoktsü imlar.