Mayangnokcha GHSS küm 75 ajungba Jubilee meraketa agiogo

Tongti tesemdanger School Education & SCERT Minister, Yitachu, ADC Mokokchung aser Planning Committee Convenor, Bendanglila nati MGHSS indang Plainum Jubilee Souvenir sayatsüdang tangokba noksa ka angur.

Mokokchung, September 16 (TYO): Mokokchung nung aliba Mayangnokcha Government Hr. Sec. School (MGHSS) tenzüker küm 75 ajungba Platinum Jubilee sentong Hokolbarnü yangi par school auditorium nung meraketa agiogo. MGHSS ya Nagaland nung school tejentiba rongnung ka lir.
Tanü iba sentong nung tongti tesemdanger Nagaland Education & SCERT minister, Yitachu-i jembidang, shisaliok ya sota ayuba maparen ka masü saka meyipa agütsüba maparen ka lir, ta metetdaktsü.
“Osettsüset meyipa agütsübaji masü saka chichiba education-ji lanuasensortem nem shisatsü meyipa agütsütsü nüngdaker,” ta paisa ashi.
“Shirnoki education tajung ngur ibaji lokti nem meyipa agütsür, item loktiji tejakleni aotsü,” ta paisa shisem.
Tanü lanur aikati mapa bushitsü atema dang azünger, aser aikati züngzüker külen yimtak yimtsüngi oa mapa meinyakner, ta paisa asen lokti nung atalokba kar lemsatep.
“Asen state ya azüng-zülu (literacy rate) tsütsübo national average dang nungi teimba lir, aji takok tulu lir, aji saka education-ji yangji metembanger,” ta paisa shisem.
Tanü Naga nunger lokti nung chichiba education lidaktsünüba o kar ashidang pai, “Lokti ka tejakleni aotsü atemaji degree kisüng masü saka chichiba education-ji bushitsüla,” ta tayongzükba ka agütsü.
Kecha lima nunga senso ajak nem sorkari mapa agütsüba mangutsü, ‘ashiko kotak nunga asenok ajak nembo mapa magütsütettsü amai ni arentaka bilemer’, ta paisa ashi.
‘Lanurtemi education bushiba ya mapa bushitsü aser degree angutsü atema masü saka mapa agütsütsü atema azüngtsüla’, ta paisa ajungshia liasü.
‘Tanü ochi mashiba aser teraksa indang ajaki jembir, saka ochi pukümer mali, teraksa mitba (checking corruption) ya business ka amai kümogo, ibaji asenok asoshi kanga lendong aser tetsübutsü lir”, ta paisa tekümdangtsü ka ashi. “Itemji tongtibangsa asenok dak ochi maliba ajanga lir”, ta paisa shisem.
Iba dak sentakba nung ashidang, “asenoki ochiji tenla kidang ang bushir, saka tangalenbo asenoki ochi mebenshir, anungji, asenok kechi mapa inyakdir inyakaka, ajak nungji ochi ashitsüla”, ta paisa ayongzüka liasü.
Tanü tongti tesemdanger Yitachu-isa MGHSS pur E-Library aser Science Laboratory lapoktsüba den ano platinum nüngtem adokba jubilee nüngo kaket dena sayatsü.
Kasa sentong nung tetushi tesemdanger Dr. Kilemlaia mapang tatsüka agia tesentepertem ayongzük. NBSE chairman Asano Sekhose, Planning Committee mendenbula Bendanglila, MGHSS principal Arenla, ABAM executive Secy Rev. Dr. Mar Atsongchanger, Rev. Dr. Takatemjen, Pastor Rev. Ponen Longchar, tsürabur Kiremwati nungertemi tepela o den tayongzükba aser sarasadem balala ajanga shilem agia liasü. Jubilee choir-temi sentong nung ken balala ajanga tesentepertem tzüratemdaktsü.
MGHSS ya 1941 küm tenzük aser iba riju nungi Dr. Senka L Yaden ama, Dr. S.C Jamir ama, Rev. Dr. L. Anjo Keijung ama aser ano tongtibang nisung zünger mezüngma luyim balala nung lennirtem, tulur aser nüngtugu nisungtem aika adokogo.