Mayawati’er rally nung nisung2 ajemset

Deobarnü Kanshiram Smarak Sthal nung Kanshi Ram asüba anogo bilemtetba mung nung yirurtem Lokbandu Hospital nung anepalutsü atema anir aodang agiba noksa ka angur. (Lucknow, October 9)

Lucknow, October 9 (Agencies) : Deobarnü Lucknow nung Bahujan Samaj Party (BSP) rally ka nung nisung taoksa nung jenshidang nisung ana ajemset aser aika yirua lir.
UP yimtiba Lucknow nung aliba Kanshi Ram Smarak Sthal nung BSP tanishir Mayawati-i anir sentong tulu ka alidang iba lendong atalok.
Iba lendong nung takoksa ajurur kibong shia nem sen lakh anana teyari agütsütsü ta UP CM Akhilesh Yadav-i osang metetdaktsü.
Kanshiram Smarak Sthal telungi aitsü atema gate number 1 nung nisung telok ka nungtepdang iba lendong atalok ta osang angazüker.
Parnok nungtepdang, tetsür ana ali nung lao aser idangji tangartemi tena ajemset aser teyirurtem Lokbandhu Hospital nung anepalutsü atema anir ao.
Bahujan Samaj Party tenzüker Kanshi Ram sür küm 10 ajungba bilemtetba mung nung adentsü atema nisung meyirjang aika adenshi aser idangji lendongji atalok.