Mba SDPDB züngsemtemi Alongkima circle kübok yimtsüngtem semdang

Dimapur, February 19 (TYO) : February 9 & 10, 2016 nung Mangkolemba ADC, Imtiwapang Aier-i anir SDPDB züngsemtemi Alongkima circle/Changkikong tzükong kübok aliba yim 11 sema senzü.
Sorkar department temi mapa inyakba osang metetpelatsü aser yimdaklirtem khuret metettsü nükjidong nung Mangkolemba SDPDB züngsemtemi yimtsüngtem sema senzü.
Yim balala semdanga senzüdang Govt. School tem nung tesayur peria maliba, electrical department staff peria maliba, Health Centres aser dispensaries junga maliba onüktem lemsatep.
Yim kar nung food & civil supplies peria manguba indang onük ashi. Iba khuret ADC Imtiwapang Aier-i tekaratiba nung mapa inyaktsü aser bangdak EAC-i iba mapa ketdangsüa reprangtsü ta ashi.
Taruba SDPDB senden nung sorkar department aser tanga onüktem benoka olemteptsü aser ano Head of Office ajak den ADC-i Mangkolemba Sub Division kübok tzükong asemprong nung yimtsüngtem semdangtsü.