MBBS & BDS courses atema Naga nunger kata temsüa mali: FP Solo

Kohima, September 05 (TYO): Tanü Commissioner & Secretary of School Education Department, F P Solo-i, MBBS  aser BDS course atema admission agitsü asoshi Nagaland nungi candidate kati danga National Eligibility-cum -Entrance Test (NEET) nung takok mengutet, ta metetdaktsüogo.
Yangi Kohima nung State Level Teachers Day anogomong amungdang Solo-i, “MBBS aser BDS course admission atema taküm küm-a asen chirtem kati danga NEET tatidang nung takok mengutet,” ta ashi.
Ajisüaka pai, tia ka-a tang tesüsabuba (last chance) state nem achaayanga entrance test agidaktsübayong candidate 51-i takok angu, ajisüaka tia makai Backward tribes nungi aikati takok mengutet, ta ashi.
Ibayongji tang kaketshir tentet kari Directorate of Technical Education aitsüdar, ta paisa ashi.
Sangküm nungibo MBBS aser BDS course atema candidate shimtsü asoshi NEET results dang agitsü ta metetdakja Solo-i, tang amai iba tatidang nung shingaia takok menguteti dang ora kümshia state nem lemzüktsüba menden aseni magitettsü, ta ashi.
“Asen chirtem dak tetoktepba shisatsü alitsüla, meranga inyaktsüla aser linük nung tangar tanurtem den tokteptsü nüngdak. NEET nung takok angutsü atema asenoki asen kaketshirtem junga renemshidaktsütsü nüngdak,” ta paisa ashi.
State nung Maths aser Science education tamendakdak junga yanglutsüla ta shia pai, “Iba ya asenok ajak- mapatong benokertem, school ketdangsertem, tesayurtem, tsüraburtem aser kaketshirtem atema tayongzükba tulu ka lir.  Asenoki asen chirtem aser lokti atema tarutsü jenjang tajung ka yanglunüra asenoki asen khuret mepaidoktsüla,” ta ashi.
“Tsüraburtem aser loktii asen tesayurtem nem khuret tulu agütsübaji angatettsüla. Asen chirtem dang sayua shisaliok agütsütsüji asen teinyaktsü mapa. Ajisüaka tsüraburtem aikati, talisa azüng-zülu mashiba aser sensaker tsüraburtemi pei chirnür shisaliok atema tesayurtem dak dang metaloker/imlar,” ta Solo-isa shisem.