MBC youth department küm 100 nüklaba sentong meraketa agiogo

Choir züngsem nisung noklangkati Ao ken kaket No. 300 nungi atendang agiba noksa nung angur.

 Dimapur, September 14 (TYO): Merangkong Baptist Church (MBC) Youth Department Centenary benjungmung 2020 küm amongtsü atema yimtak aser tesem balala nung alir yimer lanurtem ajak tanüla jenjang renemshia alitsü aser benjungmong nüklaba sentong ka September 13, 2015 anogo MBC Tenla kidang takok ngua agiogo.

“Teintet Khristan taküm” omen nung ajemdaker iba sentong akaba mapang tongti O jembir Wb. T. Nungsang Jamir-i, nüburtem dang tanüla aser taküm yimya libaliro ajak nung inteta liteter taküm ka-ka süteta renema atatsü ayongzük. Lanurtem centenary amongtsü aliba tamaitsü iba sentong nung lanur choir züngsem noklangkati Ao ken kaket nung No. 300 tena tesentepertem ajak tzüratemdaktsü. Lanur choir züngsem nisung noklangkati shilem agia ken atenba ya choir züngsem timtibai shilem agiba rongnung ka asütsü akok.

Sentong nungsa Aor rongnungi mezüng tamanger Merangkong senso asür Longjanglepzük (1951 küm tzüsena Yisu yimsü agizük) pa ama Merangkong lanurtem nungia metsüh tajung, tamangdir aser tashi-tawar atokdakjang ta nüburtem ajaki Tsüngrem dang tanüla nung takhangba yoka sarasadem tajung agia liasü.

MBC youth department 2020 küm centenary amongtsü küm pongu dang anünga lir asunung iba atema lanurtemi kanga meranga sentong balala agia asameyang tenzüka arudar.