MCC-i cricket asayartem nem Red Card temerenshi agütsütsü onük benoker

Mumbai, December 07 (Agencies): Taruba 2017 küm nungi tenzüka, cricket asayartem nem red card temerenshi agütsütsü aser cricket bat tasazük latettsü asoshi alima ajunga nung cricket asaya den sentakba temzüng ozüng yanglur, Marylebone Cricket Club (MCC) World Cricket committee-i tanü, Bodbar nü onük benokogo.
MCC ludeni anogo 2 tashi agia senden amenba sülen cricket nung tan asensa, asayartem nem red card temerenshi agütsütsü aser cricket bat tasazük latettsü onükji benoker lir.
Tan benokba onük ya ozüng küma agizüka benshira, cricket asaya nung asayar kati umpire, külem asayar, asaya ketdangser mesüra asaya repranger ka dak teka sangshia, raratepba ken o nung ajemdaker, aibelener asayar nem red card temerenshi agüja, pa/la asayadak nungi tugudaktsütsü tashi umpire-tem nem agütsür asütsü.
MCC’er tongti ludeni tan benokba onükji agizükra, iba ozüng tasen ya taruba 2017 küm October ita 1 nü nungi tenzüka, cricket asaya ajunga nung benshitsü sentong lir.
“Asayartemi asayadak teka sangshia raratepba densema, tazüokba lia masayartem nem tapet temerenshi agüja, asaya jenjang tajungba kümdaktsütsü nükjidong nung tan ozüng tasen latettsü onük benokogo,” ta MCC luden nung mendenbuba, tesüiba England captain, Mike Brearley-i osang jangjashitsü.
Ano, asaya jenjang tajungba kümdaktsütsü nükjidong nungsa batsman-temi amba cricket bat tasazüka lateta ayutsü onüka par ludenisa benokogo.
“Batsmen timbakati bat tasazük millimetre (mm) 40 tapak amshir saka karibo bat tapakji 67mm tasazüka amshir. Anungji, asayar kar nem talila tajangzük magütsütsü aser asayatsüren liromedemdaktsütsü nükjidong nung bat tasazüka lateta ayutsü onüka benokdangogo,” ta Brearley-isa shisem.
India kübok Mumbai yimti nung amenba MCC senden nung Board of Control for Cricket in India (BCCI) nung Tir, Anurag Thakur aser International Cricket Council (ICC) nung Chief Executive, David Richardson nata adenba osang angazükogo.