MCC-i Power Department den yariteptsü mepishir

Dimapur, September 23 (TYO): Mokokchung jila nung kanga dang nüngdaka aliba ama Department of Power-i AM Road aser IM Road nung HT Power line enoktsü atema mapa inyaker. Anungji iba nung sendaktepa alirtem aser public-i amalitepa yariteptsü mepishir, ta Mokokchung Chamber of Commerce and Industries (MCCI)-i metetdaktsüogo.
PWDN (NH), Urban Development Department, Mokokchung Municipal Council aser tanga line department ajaki iba mapa nung power department den yariteptsü mepishir. Maneni, All Ward Union Mokokchung aser Mokokchung jila nung alirtemi akokba tashi yaritsü shisemer, ta MCCI-isa ashi.
MCCI-i power department den March 2017 nungi iba dak sendakba atema jembia arur aser power department-i iba mapa inyaktsü mulunga agizükba atema kanga pelar. Mokokchung ya Nagaland nung tongti jila ka lir aser Mokokchung district dang masü saka anameta aliba Tuensang aser Zunheboto district tem nüngdakba peritsür. Anungji power supply shitak alitsübaji kanga nüngdaker, ta MCCI-i sangdong nung shia lir.