MCC nung ajemdaker Rafale deal kaket sayatsü EC-i memela

New Delhi, Rongchii/April 03 (Agencies): Lok Sabha election agitsü lia Rafale deal kaket sayara ibaji Model Code of Conduct (MCC) alema asütsü, ta shia Election Commission of India (ECI)-i iba kaket sayatsü memela.
EC-i Rafale deal kaket sayatsü nokdangba ashishia activist aser nüngtugu lawyer, Prashant Bhushan-i, Election Commission-i Ato kilonser, Narendra Modi indang film bo sayatsü melar aser election nüboyim sentong atema AIR aser Doordarshan amshitsü atema Modi dangbo melar, saka Rafale deal kaket sayatsü memelaba ya tim masü, ta aitsü.
Rafale deal kaket sayaba sentong ya Hindu Group Managing Director, N. Ram leniba nung agitsü liasü. Ram-ia Rafale deal indang osang aika zülua liasü.
Osang angazükba agi, iba kaket 148 bo kaket zülusang office nungi puogo.
“Rafale: The Scam That Rocked The Nation” kaket ya S. Vijayan-i zülu aser iba kaket publisher-i iba kaket ya school ka nung sayanüa liasü saka school ketdangsertemi EC-i ashishiba nung ajemdaker par school nung kaket sayatsüji memela. Anungji iba kaket publisher, Bharati Publication-i parnok office nung sayanüa liasü, saka election officers flying squad aser Teynampet police nati kakettemji apu.
Item tatalokba atema EC aija N Ram-i, iba ya democratic alema lir aser ozüng alema lir, ta ashi. Paisa, iba kaket sayaba ajanga model code of conduct alema meinyaktsü, anungji pai court nung temepishiba ka benoktsü, ta metetdaktsü.
EC aija nüngtugu lawyer, Prashant Bhushan-i twitter ajanga, “EC-i Model Code of Conduct nung ajemdaker Rafale ochimashi kaket sayatsü memelar aser kaket kar puogo, ajisüaka EC-i Modi indang film bo sayatsü melar aser election onük jembitsü atema AIR & DD amshitsü memelar. Election atema Railways & advertisement sen amshitsü sorkar dang melar, saka Rafale deal kaket sayatsübo memelar!,” ta aitsü.