MCCI-i lungkak aittsü ayongba athir

Dimapur, Yimpoksüi (November) 2 (TYO): Mokokchung nung tensa süngjema aser tiptema ayutsü atema Mokokchung Chamber of Commerce & Industry (MCCI)-i dokak aser shishilembadak shibangtsü ayongba thiogo.
Tangatetba tajung nung aser tesentaktep meraksatsü atema MCCI-i iba telemtetba agi, ta Tir Tsukti Longkumer aser Tongti Tezülur Limalenden Longkumer nati sangdong ka nung ashi.
Tanü MCCI Conference Hall nung Ao Senden aser All Ward Union Mokokchung (AWUM) pur lia MCCI aser NSCN/GPRN ketdangsertem tsüngda senden ka amen. Iba mapang tebilembatem benoka lemsatep aser Mokokchung nung tensa meraksatsü tangatetba nung telok anapronglai angatetteptsü mulungtep aser iba asoshi bangzüng asem renem, ta MCCI mendenpurtemisa ashi.
Iba ken o atema Ao Senden-i telok ana tsüngda mapa tajung inyakba atema aser AWUM-i onok posema nungitba atema kanga pelar ta MCCI-isa metetdaktsü.
Mokokchung district administration aser police-ia mapang shitak nung mapa inyakba aser yaritepba atema MCCI-i pelaba shisemer, ta mendenpurtemisa ashi.