MCCI-i nüburtem süngjemshitsü mepishir

Mokokchung, April 14 (TYO): India ajunga nung lockdown May 3, 2020 tashi atsülangba den ano Dimapur nung Covid 19 positive putetba osang jagi Mokokchung nüburtem maoksatsüla saka süngjemshia sorkar bangdaki kechi tetuyuba agütsür, iba nungji tashi angaa anitaktsü mepsihir, ta Mokokchung Chamber of Commerce & Industries (MCCI)-i sangdong ka ajanga metetdaktsüogo.
Iba lockdown mapang timtem jenti liaka, nüburtemi sorkar bangdak den amalitepba asoshi MCCI-isa pelaba olen ka lemsatep.
Mokokchung market nung tongtibang nungdakba chiyungtsütem ajak peria lir ta tanaben nüburtem dang nenshia ashir aser yamaji lidaktsütsü asoshi akokba tashi inyakdar, anungji, nüburtem aoksar chiyungtsü talila alidena meyudaktsünür”, ta MCCI-isa mepishia ashi. Iba dak sentakba nung “Kodang alima tensa tia süngjema kümdir, chiyungtsü talila alidena ayur ket nungi onoki tanaben malizüktsü, anungji, nüburtemi aji meteta shishidaktsünür”, ta parnokisa shisem.
“Iba lockdown ajanga Mokokchung nung business inyaker lenmang aisü nung takoksa ajurua arudaki, aji saka, nenok ajaki aremzüka bangdak den amalitepba asoshi talisa business inyaker ajak dang pelar”, ta MCCI-isa ashi.
Mokokchung Task Force-i anir Covid 19 tongpang nung yakbangsür (frontline workers), mezüng langzürtem (first responders), Core Committee on Essential Commodities COVID-19 Mokokchung aser lokti tentet shirnokisa iba alima wara anema raraba nung shilem agidar, parnok ajak dang MCCI-isa pelaba metetdaktsü.