MCCI-i police & administration dang pelar; Public nem tenüngsang agütsür

Dimapur, February 6 (TYO): January 29, 2018 nungi Mariani nung amenoka aliba truck drivers’ union-i lungkak aitba ajanga Mokokchung jila aser temeket nung tang nüngdakba chiyungtsü aser osettem joko tatemer liasü. Ajisüaka, Mokokchung district administration-i tebang ia mapa inyakba ajanga tanü iba onük angatettepogo.
January 28 nü nisung kari truck anishir ka dak teka sotakba ajanga lungkak aittsü tenzük. Truck anishir dak teka sangshirtemji Mokokchung police-i apu saka truck anishirtemi parnok tejashi sayua lungkak aittsü telemtetba agi.
Mokokchung police aser administration-i mapang shitak nung iba ken o angatettepba atema kanga pelar. Maneni, public-ia petsaperong mesüi, timtem arema aruba atema tenüngsang agütsür, ta Mokokchung Chamber and Commerce & Industry (MCCI)-i metetdaktsü.
Talisa, LPG agi meperiba khuret ya iba onük ajanga masü ta MCCI-i osang jangjashitsür. Iba khuret ya bangdakpurtemi anepaludar anungji consumer temi kasa tangatetba tajung sayua koda masüba timtem arema atatsü mepishir, ta MCCI-isa metetdaktsü.