MCCI-i Republic Day atema metetdaktsür

Dimapur, January 24 (TYO) : Mokokchung district administration-i mepishiba ama Mokokchung Chamber Of Commerce & Industries (MCCI) kübok züngsem ajaki January 26 nü Imkongmeren Sports Complex, Mokokchung nung Indian Republic Day sentong nung adentsü metetdaktsür, ta MCCI sangdong ka nung metetdaktsü.
January 26 anüngdang 12:00 ako tashi mesüra sentong metembang tashi dokan aser shishilembadak ka danga melapoktsü, ta MCCI President, Tsukti Longkumer aser General Secretary, Limalenden Longkumer nati sangdong nung shia lir.
Mokokchung nung telok kari dokan aser shishilembartem dang tashiyim agi sen meshiba shidi agütsüba osang MCCI-i angazükogo. Anungji, MCCI office-i memeteti nisung shingaia telok kecha nema saru magütsütsü tetuyuba agütsür, ta MCCI mendenpurtemisa sangdong nung metetdaktsü.