MCCI-i taila osettsüset ayokertem apu

Dimapur, May 28 (TYO): Mokokchung district nung nisung kari taila electronic aser kidang amshiba osettsüsettem yoka senzür, ta Mokokchung Chamber of Commerce & Industry (MCCI)-i metetdaktsü.
MCCI ketdangpurtemi May 27 nikongtsütsü taila oset ayoker nisung asem apu. Yashinep 10:00 ako meta Changtongya nung taila osettsüset ayokertem senzüdar ta osang angazük aser nikongtsütsü 2:00 ako meta kasa telokji Yaongyimti aser Chakpa yimtsüngtem nung senzüba osang angazük, ta MCCI-i ashi.
Iba osang angazükba sülen tebilemtsü abenba sensotem aser MCCI züngsemtemi Akhoya yimtsüng anasa taila oset ayokertem indang gari ka sottet. Iba mapang Maruti Alto gari temesüng ka jena ao saka Maruti Van ka sot, ta MCCI-isa metetdaktsü.
Iba gari nung Muhi Ali’er jabaso Rijul Ahmen, Jalam Uddin’er jabaso Faheem Uddin aser Babul Ali’er jabaso Bablu Ali nungertem mena lia apu. Parnok ajak ya Amguri, Assam kübok Hiragaon yimtsüng nung alir.
Par asem ket nung taila Samsung LED TVs aser tanga electronic oset tamajungtem bena liasü. Parnok ket nung ILP maliasü. Parnoki ketdangsertem dang nungi temelaba magii aser GST challans mebeni taila osettsüsettem yoka senzü. Parnok apuba sülen Changtongya police station ket nung agütsü, ta parnokisa shisem.
Iba inyakyim ajanga Tuli nung aliba inter-state check post nung police-i kodaser ILP melii parnok süidaktsü ta asüba tasüngdangba ka arur. Tarutsü nungbo village council lennirtem aser nübortemi kanga kümdangtsüla aser taila osettsüset ayokertem indang osang anasatiba police station nung osang sangoktsütsü mepishir, ta MCCI-isa metetdaktsü.