McCullum-i fastest Test century yangluogo

Christchurch, February 20 (Agencies): Australia den tasayadak 2 buba Test asaya nung New Zealand captain, Brendon McCullum-i ball 54 nung runs 100 yanglua alima ajunga nung Test century tekaratiba yanglur asayar küma otsü tasen ka tanü, Honibar nü yangluogo.
Test asaya 101 buba nung shilem agisang, McCullum-i tekaratiba Test century otsüji yangluba sülena maneni runs 45 tashi yanglua tanü asaya nung par N Zealand telok asoshi ajak agi runs 145 tashi yanglutsü.
Tesüiba West Indian captain, Viv Richards aser Pakistan captain, Misbah ul-Haq nati ball 56 nung runs 100 yanglua tekaratiba Test century otsü aroki bena liasü saka McCullum-i tenati yangluba otsüji ajangteta alima ajunga nung tekaratiba Test century yanglur asayar akümer lir.
McCullum-i runs 145 yangluba densema, taoba asaya nung tamakok ajurua points 0-1 agi tekübokba jenjang anguba N Zealand teloki ajak agi runs 370 yanglu.
Australia telokia tanü anogo tembang tashi nung wicket 1 laoa, ajak agi runs 57 tashi yangluba osang jangjaogo.
Arishi küm 34 tain, McCullum-i tan Test asaya tembanga shilem agiba sülenbo international cricket asayatsüren toktsütsü renema lir.

You must be logged in to post a comment Login