MCD, Angh, CM & DDCF nunger Idd salem abener

Dimapur, July 17 (TYO) : Muslim Council Dimapur (MCD)-i Nagaland nung alir ajak dangi Idd salem abener ta MCD working president, A. Rahman-i sangdong ka ajanga metetdaktsü.
Ita ka lumiba sülen amungba Idd-ul Fitir ajanga lokti nung alir ajak dangi yimjung aser telongjem bener arutsü imlar, ta paisa shisem.
Nagaland Angh P.B. Acharya-ia Nagaland nung Muslim nunger ajak dangi Id-ul-Fitr salem metetdaktsüogo.
India ya tamangba yimsü tebendang maliba loktiyimtem linük ka lir aser senso ajaki pei tamangba yimsü sülen anidaktsü aser sangdongtsü temeten lir, ta Raj Bhavan sangdong ka nung shia lir.
Id-ul-Fitr ya Muslim nunger ajaki Tsüngremi moatsüba atema tetushi agütsüba, tepela lemsatepba aser mapa tajung inyakba benjungmung ka lir. Iba benjung ajanga Nagaland nung alir nem yimjung, azükaru aser terenlok bener arutsütsü imlar, ta Angh-isa metetdaktsü.
Nagaland Chief minister, TR Zeliang-ia sangdong ka ajanga Muslim nunger ajak den Id-ul-fitr salem lemsatepogo.
Muslim nungertemi aremzükba, alima nung yimjung aser nisung balala tsüngda temeim prokshitsü atema osang sangdongdang, ta chief minister-isa ayongzük.
Ano, tanga sangdong ka nung Dimapur District Citizens Forum (DDCF)-ia Muslim nunger ajak dangi Idd benjung salem lemsatepba metetdaktsüogo.
Alima ajungalen Muslim nungertemi Ramadan ta ajaba ita ka lumia amungba sülen Idd-ul Fitir benjung amunger aser iba ya alima nung yimjung aser telongjem atema lir, ta DDCF tir, Joseph Lemtur-i sangdong nung shia lir.