MCD-i par nübur danga state nungi marui atatsü ajungshir

Dimapur, Monupii/May 11 (TYO): Muslim Council Dimapur (MCD) ajanga Muslim nunger danga state nungi Nagaland-i maruteti alirtem dang taruba ita ana tashi mesüra sorkari tensa junga kümogo ta mesangdong tashi marui atatsü ashi.
Muslim nungertem ajangzüktsü aser talisa Nagaland nung aliba senso ajak taküm kümzüka alitsü mechi Muslim kintem lungjemer iba telemtetba ya agi, ta MCD working president Ahidur Rahman-i ashi.
State-i arunüaka maruteti alirtem nem council ajanga teyari agütsütsü merangtsü mesüra Nagaland sorkar dang yaritsü mepishitsü, kechiaser parnok timba MCD aser Jama Masjid committee balala nem state-i arutsü mulunga aliba metetdakja tenüng agüja lir, ta ashi.
Maneni district administration den lungjemer quarantine centre amenoktsü aliba maparen athir, ta sangdong ajanga ashi.