McDonald-i Del Potro kokogo

Tsüklai/February 23, 2019 (Agencies): America nunger asayar Mackenzie McDonald-i Hokolbarnü ATP Delray Beach Open quarter-finals nung Argentina nunger top-seeded Juan Martin del Potro kokogo.
McDonald ya jenjang 84buba nung lir aser pai jenjang 4buba nung alisang Potro 6-4, 3-6, 7-6 (7/5) agi koka tang mezüngbuba ATP Tour semi-final ka tongtetogo. Maneni pai tang mezüngbuba top 5 nung aliba asayar ka koktetogo.
Shanghai Masters nung taoba küm October ita temokok yiruba sülen Del Potro tang mezüngbuba asayamung ka nung asayaogo.
Asaya nung Potro kanga sademabo masaya aser mezüngbuba set mekoki liasü. Ajisüaka pai serve kanga junga aoba den forehand kanga junga asayaa tanabuba set akok.
Iba sülen tena tsüngda tiebreaker asayatsüsa aküm koba McDonald-i smash ka malokja akok.
Arishi küm 23 tain McDonald, semifinal asaya nung Moldova nunger Radu Albot den asayatsü shibai 1-6, 6-3, 7-6 (7/5) agi America nunger Steve Johnson koka liasü.
Del Potro maneni taruba hopta Acapulco nung asayatsü renema lir, kong pa nem pa indang title defend asütsü atema wild card agütsüba pai agizükogo.
Maneni pa March ita Indian Wells Masters nung pa indang title defend asütsü.
Kasa asayamung tanga asaya ka nung US nunger second seed John Isner-i 7-6 (7/2), 6-4 agi Adrian Mannarino kokogo.
Isner-i tang tashi nung Mannarino tenetben koka lir aser asaya ajak senteper pai set ka dang mekoki lir. Pai tang iba asaya minute 93 buba nung koka Daniel Evans den asayatsü jangjaogo.
“Adrian-i tanü kanga junga asayaogo ta bilemer. Mezüngbuba set nung break point asem tashi kümzüktetba tu set point ama ni bilem. Ni tanabuba set nung pa indang serve ka break süteta liasü aser khen khenbo kaji dang nüngdaker,” ta Isner-i ashi.
Evans shiba jenjang 1498 buba nung lir pai Italy nunger sixth seed Andreas Seppi 6-4, 6-4 agi kokogo.
Evans-i mezüngbuba round nung defending champion France nunger Tiafoe koka liasü aser pa atema 2017 Sydney International sülen iba ya mezüngbuba ATP Tour semi-final asütsü.