McGregor den yimjung yanglutsü akok: Nurmagomedov

Yimpoksüi/November 27, 2018 (Agencies): UFC champion Khabib Nurmagomedov-i Tentonü ashiba agi, pa Conor McGregor den yimjung yanglutsü akok. Taoba ita title atema tsüngtepba nung mangatettep adokba sülen Khabib-i iba olen lemsatepa liasü.
Mongputeni/Oct 6 nü masaya tsüngda asayar ana o langtepa liasü aser asaya tembangba sülen Nurmagomedov-i McGregor’er team amak.
“Ajak takoktsü. McGregor küna mangatettep adokba ama longjemtsüa akok,” ta Nurmagomedov-i ashi.
Paisa, pai Irish nunger asayar ajuruba mapang koda asütsü ajibo memetet ta ashiba den, “tatok magütsüteptsüba onok shiba? tulusang tsüngremia tatok agütsür nung koda,” ta pai ashi.
“Tenüng tajung aser senotsü dak sendakba den saisapong dak ajemdaker Mayweather den asayatsüji jangratemtsü taketba asütsü,” ta Nurmagomedov-i ashiba den McGregor den asaya mapang mangatettep adokba dak sendakba nung Nevada State Athletic Commission-i Luchii/Dec 10 nü obendang agütsüba sülenang asaya atem jembishinütettsü ta ashi.
Nurmagomedov ya Muslim yimsü dak bendanga agüja amanger ka lir aser pa Russia nung kanga tang tongtibang kümogo, shibai pa aliba tesem Dagestan nung aonung libaliro aija arudar. Russia nunger asayar aika asaya nungi anenba sülen politics nung adener aser parnok rongnung heavyweight boxer Nikolai Valuev densema lir, shiba tang parliament züngsem ka lir, saka Nurmagomedov-i ashiba agi, pa politics nung adentsü kecha sentong mali.
“Ni politics nungi pilaa alitsü meranger. Tongtibangtibaji nüburtem yaritsü asoshi tejangraba alitsüla aser iba mapa inyaktsü asoshi na parliament züngsem ka akümtsü nüngdak madoker,” ta pai ashi.