McGregor-i Mayweather mela-mela akoktsü nangzük

August 18, 2017 (Agencies): Taruba hopta tsüngteptsü aliba nung Conor McGregor-i Floyd Mayweather ya round ana nung dang akoktsü amai bilemer. Las Vegas nung August 26 nung tsüngteptsü aliba nung glove tepungpaba amshidaktsütsü melaba ajanga tajangzük tulu angutsü, ta Irish nunger mixed martial arts, McGregor-i Bodhbarnü osangbener den jembidang ashi.
Taoba mapang welterweight tuozük nung shingaia makoksang, Mayweather den tsüngtepba nung McGregor-i makoktsü amai nisung aikati bilemer, saka pai Mayweather ya mapang talangka magie akoktsü, ta atemzüka yutsü.
“Tuozük ounce ti indang gloves semer tsüngtepdang pai round tanabuba majangtettsü, ta ni amanger,” ta McGregor-i ashi.
“Ajibo tia kaa tsüngshiogo, ta nüburtemi ashiba ni maginür. Pai mapang tatsükabo noktaktsü amai bilemer aser iba mapang kü indang sempet sayutsü aser pa laodaktsütsü,” ta arishi küm 29 tain, McGregor-i ashi.
T-Mobile Arena nung tsüngteptsü asoshi training tesashi agiba ajanga tensa mashi nung nokdaktsü renema lir, ta pai-sa ashi.
“Ni pa den round 12 tashi tsüngteptsü renema lir aser tekeraba nung akoktsüa renema lir,” ta McGregor-i maneni ashi.
Glove tuozük melenba ajanga tsüngtepba nung temelenshi arutsü südi, ta Ultimate Fighting Championship (UFC) tir, Dana White-ia ashi.