‘McJesus’ art display anema Israel Khristanpur longkak ait

Haifa, Aenjeti/Jan. 14 (Agencies): Israel nung Khristan lennirtemi Haifa nung art exhibit ka aitsü aser Khristan yimsü mezüngmeshir ta ashi.
Finnish artist Jani Leinon-i yangluba “Sacred Goods” osettem rongnung süng/long agi jitetba Ronald McDonald kangki nung meta aliba, koba dang “McJesus’ ta ajar, kangki nung meta aliba Yisu-i shopping bags aser Ken doll box nung Yisu kangki nung metaba yua liasü.
Yerusalem nung arogo balala lennirtemi Aenjeti/January 12 nü osang ka sangdongba nung, Haifa Museum of Art nung aliba noksa ya tim masü aser kanga sashia aitsür, ta shia lir.
“Iba exhibition nung aliba rongnung Khristan yimsü nung kanga tongtibang noksatem aser temaitsütem mezüngmeshiba noksa lir. Iba amala inyakyim ya onoki magizükteter aser tekeraba nung tatok nangzüka raksaa indoktsüla. Yihuda nungera süang, Khristan-a süang mesüra Muslim nungera süang, tamangba yimsü dak sendakba noksa aser temaitsütem ya wazüka ayutsüla aser akhumtsübua amshitsüla,” ta sangdong nung shia lir.
“Israel nung ‘free expression’ aser ‘free speech’ temeden agüja lir, saka Temeshi Lima aser tümerik Abrahamic Religion asem ya mapang ajak nung akhumtsübua amshitsüla. Iba ama mezüngmeshi yimya ajanga Temeshi Lima nung nüburtem tsüngta kati ka den jungtepa alitsü asoshi lenmang melapoktsür,” ta arogo lennirtemi ashi.
Parnoki Municipality of Haifa aser Haifa Museum of Art ketdangsertem dang item noksa ya agientsü shiogo aser iba exhibition ketdangsertemi tatok meshitsüla, ta akhanger.
Rogonü Khristanpur noklang aika iba museum kima longkak ait aser iba mapang police ketdangser asem yiru aser nisung ka apu.