MCP puri Imphal yimtiba ghonda 24 mokdang

Imphal, November 6 (Agencies): Manipur nung telungpur telok kati Deobarnü Imphal yimtiba Ghonda 24 mokdanga ayuba ajanga inyakyim ajak nung kongshiogo.
‘The Maoist Communist Party’ puri Consumer affairs, Food and Public Distribution minister Karam Shyam-i ochi mashi mapa inyakba atema pa mapa nungi anenjang, ta khanga iba sentong ya ayongzük.
Minister-i pa anema benokba ochi mashi ken o aitsüogo, koba tang tashi nung kuli kecha nguteta mali. Pai ashiba agi, pai ochi mashi mapa inyakba anema kuli tejangja bener arutetra, pa mapa nungi anentsü.
Police sangdong ka ajanga ashiba agi, telungpurtemi yimti mokdanga ayoba mapang nung lendong timtem atalokba kecha meliasü. Kasa sangdong ajangsa ashiba agi, yimti mokdanga ayuba kecha mereprangtet, kechiyong lenmang nung gari odang senzüogo aser dokan aser shishilembadak ajak tanga mapang ama dang lapoka mapa inyakogo.
Maoist Communist Party puri ashiba agi, ita shia Manipur nem jang 120,377 MT agütsür, koba nüburtem asoshi teperi lir. Ajisüaka parnoki ashiba agi, janga ya shilem tila ka dang nüburtem nem agütsür aser tanungbajibo ozüng alema yokyayokjir.