MDBA-i Inter Club Badminton Championship ayonger

Mokokchung nung asayatsü ayongba Inter Club Badminton Championship den sentakba senden ka osangbener den amenba sülen Mokokchung District Badminton Association ketdangsertem arok noksa ka yangi angur. (Mokokchung, October 22)

Mokokchung, October 22 (TYO): Mokokchung kübok Imkongmeren Sports Complex nung Inter Club Badminton Championship 2016 tan October ita 26-29 tashi asayatsü asoshi Mokokchung District Badminton Association (MDBA)-i ayongogo.
“Mokokchung nung badminton aser badminton asayar telok jenjang temaba jenjang nung ajungkettsütsü aser asayartem aniteta, parnoki peipok mesütettsüsa asayatsü ajungmesotsü nükjidong nung tan asayamong ya ayongogo,” ta MDBA tayonger luden nung mendenbuba, I. Lipokmeren Jamir-i osang jangjashitsü.
Team event yimya amshia, asaya 7 nung asaya timtiba akoker shimtsü asayamong nung shilem agitsü temeten Mokokchung district aser MDBA nung tenüng züluoka alir teloktem nem dang agütsütsü renema lir.
Tan asayamong nung Under 13 (U-13) tebur singles, U-15 tetsür singles, U-17 tebur singles, tebur doubles, Veterans 35+ tebur doubles, Veterans 45+ tebur doubles aser mixed doubles densema, shilem telemsa 7 tashi küma lemsar asayatsü renemogo.
Tanü tashi nung Mokokchung jila aser temeket yimtsüngtem nungi asaya telok 6 tashi tan asayamong nung shilem agitsü atema tenzüng züluoka lir.
“Tan asayamong den sentaktepa, kentenmenü sentong balala ayonga agitsü aser asaya reprangtsü taasen sen 20 dang alitsü,” ta shia, tejangrar ajungai arua asaya reprangtsü tayongzükba olen ka MDBA ketdangsertemi metetdaktsü.
“2040 küm tashi nungbo Mokokchung nungi Olympics nung shilem agir asayar karbo adokdaktsütsü  nükla yur MDBA-i mapang shia saisapongtsü sentong balala ayongtsü tebilemba lir,” ta parnoki lemsatep.
“Naga nunger dak badminton asayatsü sempet tajung lir aser badminton asayaba ajanga mapa anguba asayara jenti lir,” ta shia, sempet aketba lanurtem anitettsü alizüng ayuba olen ka parnokisa metetdaktsü.
“Sorkari dang lenmang lapoktsüra, Mokokchung nung badminton sayudak ka tentettsü nükla lir,” ta parnoki par pungmang lemsatepa liasü.