MDCA-i Inter Club Cricket asayamung ayonga asayatsü

Dimapur, November 13 (TYO) : Mokokchung District Cricket Association (MDCA)-i Silver Jubilee nüngtem nung January 2017 nung Inter Club Cricket Tournament ayonga asayatsü, ta MDCA Tir, Er. Chubatoshi aser MDCA Tatong Tir, Imnatoshi nati sangdong ka ajanga metetdaktsü.
Iba asayamung nung asayatsü jangrar aser association nung tenüng alirtem atema Entry form tem November 15, 2016 nü nungi Allahabad Bank, Mokokchung den lentongi aliba Camellia nung angutsü, ta sangdong nung shia lir.
Tenati ashiba agi, iba asayamung ya T20 asayaba yimya nung asayatsü aser takok angur nem sen 1,00,000/- senpet agütsü aser asayamung nung adentsü pur telok shia dang nungi tenüng züluba taa sen 5,000 agitsü.
Kasa sangdong nung, tesüiba mapang tenüng agüja aliba club tem den tang aliba cricket club ajak January 2017 nung MDCA Silver Jubilee nung shilem agitsü ayongzüker, ta shia lir.