MDCA Inter Club T20 Cricket mezüng asaya Titans CC-i akok

Mokokchung, Aenjeti/January 04 (TYO): Imkongmeren Sports Complex nung Aenjeti/January 04, 2019 Rogonü MDCA Inter Club T20 Cricket asayamung mezüng asaya nung pezüben tashi atonga takok angur Titans CC-i United Brothers wicket 8 agi tsükdaktsü.
Iba asaya metenzük tsüngda asayamung nung shilem agirtem ajaki taoba MDCA General Secretary asür, Imnatoshi nem minute ka süngjema tetushi agütsü.
United Brothers CC-i toss koka mezüng batting asütsü shim aser parnoki over 20 nung wicket 7 out süa run 138 yanglutet. United Brother atema asayar Nriben Rai-i run 83 aser Merenchet-i run 44 yanglua liasü.
Titans CC nungi asayar Aloto-i over 4 nung run 12 agüja wicket 4 agi kasa mapang Odiyanger-i over 3 nung run 12 agüja pai wicket 2 out sütsü.
Innings tanabuba tenzüker over mezüngbuba indang ball tanabuba nung Titans nungi Sentiwapang-i opener batsman out süja liasü.
Ajisüaka, captain Neheel Rai (run 18) den deputy Captain shibai Titans CC atema run timtiba (unbeaten 75) yanglu, tenati par telok atema junga asaya tenzük.
Neehel out asüba sülen, asayar tejen Toshimeren aser Longsasunep na külemi asaya Longsabai six ka züklokja par telok 2019 asayamung mezüng asaya takok ngudaktsü. Iba asaya nung Toshimeren-ia run 34 yanglutet.
Over 16.5 nung Titans pur wicket ana tashi out sür run 144 yanglu aser parnoki iba asaya wicket 8 agi takok angu. Iba asaya nung takok anguba ajanga Titans Quarterfinals tongogo. Kasa mapang pool nungi team ana dang asüba agi United Brothers telok ya runners up ama Quarter Final atema qualify süogo.
Taküm küm iba asayamung nung team 11 agi shilem agidar. Iba den külemi team shia nungi asayar asem-sem tanga district aser kidanger state balala nungi asayar anir aruagi shilem agidaktsütsü asoshi temelaba agütsüogo.
Tanü asaya yamai alitsü:
Vincent vs Vikings (8:30 ako)
Sovran Kings vs Zunga Medem (12:00 ako)