MDCA jubilee nüngtem exhibition match balala ayonga asayar

Mokokchung, November 26 (TYO): DC XI Mokokchung teloki runs 12 agi MDCA XI telok madak takok ngua, Mokokchung District Cricket Association (MDCA) tenteter küm 25 ajungba jubilee nüngtem nung Mokokchung kübok Imkongmeren Sports Complex nung ayongba cricket exhibition asaya nung tanü, Honibar nü shilem agiogo.
MDCA jubilee-mong taruba 2017 küm January ita 4 nü amongtsü renema lir aser par jubilee osang prokshitsü aser lanurtem ajungemsotsü nükjidong nung MDCA-i ‘Instilling Aspiration’ omen nung ajemdaker Mokokchung district headquarter aser sub-division-tem nung cricket exhibition asaya balala ayonga lir.
Twenty20 (T20) yimya nung asayaba cricket asaya nung DC teloki mezüng batting süa, par teloki overs 20 nung wicket 8 laoa, ajak agi runs 131 yanglu.
MDCA asayartemi DC teloki yangluba runs ajangtettsü nükjidong yur kanga meranga asaya saka par teloki overs 20 nung wicket 5 laoa, ajak agi runs 119 dang yanglutetba yong par teloki tanü tamakok ajurua liasü.
Tanü asaya nung DC asayar, Sushil Kumar Patel aser MDCA nungi Merenchemba na nem Man of the Match sempet/senpet agütsü.
Tanü asaya dak alaka, Mangkolemba ADC XI o MDCA XI na tsüngda tan December ita 2 nü, Changtongya SDO Civil XI o MDCA XI na tan Decemeber 6 nü aser Tuli ADC XI o MDCA XI na tsüngda tan December 10 nü maneni exhibition asaya asayatsü sentong lir.
Jubilee anogomong nü, January ita 4 nü Imkongmeren Sports Complex nungsa cricket asaya ka ayongba osang ka MCDA ketdangsertemi tanü asaya tenzükba jakdang metetdakja liasü.
Mokokchung Deputy Commissioner, Sushil Kumar Patel (IAS) den külem district ketdangsertem, MDCA Tir, Er. Chubatoshi-i anir külem ketdangpurtem, MDCA jubilee planning luden nung züngsemertem aser cricket asaya meimertemi tanü exhibition asaya nung densemba osang angazükogo.