MDCA Series: MDCA XI teloki Changtongya SDO(C) XI akok

Dimapur, December 06 (TYO): Mokokchung District Cricket Association (MDCA) telok tenteter küm 25 abensaba nüngtem nung ayonga asayaba exhibition cricket Twenty20 (T20) asaya tasembuba nung MDCA XI teloki runs 32 agi Changtongya SDO(C)XI telok madak takok ngua, Mokokchung kübok Akhoya yimtsüng nung tanü, Mongolbar nü asayaogo.
Tanü asaya nung MDCA teloki mezüng batting asütsü temeten angu aser par captain, Sachin Jaiswal-i runs 52, Throngdiba Sangtam-i runs 26 aser Merenchemba-i runs 15 yangluba densema, par teloki overs 19 nung ajak agi runs 173 tashi yanglua kanga junga asaya.
SDO(C)XI asayar, Temjenmeren-ia tanü asaya nung wicket 6 tashi agia, par Changtongya telok tenüng nung kanga meranga asaya liasü.
Changtongya asayartemi MDCA teloki yangluba runs ajangteta takok angutsü nükjidong tulu yur batting asütsütsü tenzük saka par asayar, Yangertoshi, Temjenmeren aser Matsung nungeri runs 26, 16 aser 14 yangluba densema, par telok wicket ajunga overs 20 nung laoa, ajak agi runs 141 dang yanglutetba yong par teloki tamakok angutsüsa jenjang tamajung ajuru.
Tanü asaya nung runs 52 yangluba den wicket 3 tashi agisang, Jaiswal aser wicket 6 tashi agir, Temjenmeren na Players of the Match shima liasü.
Tanü asaya asayaba jakdang Akhoya Students’ Union-i ketdang asüba sentong nung SDO(C) Changtongya, Chumlamo Humtsoe aser MDCA Tir, Er.Chubatoshi nati onük tatsütsü jembia shilem agi.
MDCA teloki par taruba exhibition asaya Tuli ADC XI telok den Mokokchung kübok Tuli nung tan December ita 10 nü asayatsü renema lir.