MDCA T20 osang: Suzerain CC aser Rainbow CC-i akok

Dimapur, January 11(TYO): Tang tasayadak aliba MDCA T20 Tournament, Imkongmeren Sports complex nung tenetnübuba nung Suzerain CC aser Rainbow CC teloktemi takok nguogo.
Mezüng asaya nung Suzerain teloki wicket 6 agi Zero Boys madak takok angu. Zero Boys teloki toss akok aser mezüng batting asütsü shimtet aser over 20 nung wicket 9 out süa runs 105 yanglua liasü.
Temjenzulu-i runs 37 agia liasü aser Zero Boys telok nungi ibaji runs agir timba liasü. Suzerain telok nungi Meren ajanga runs 13 agütsü aser wicket pezü agia liasü aser Alemsashi aser Imtinuksung-i wicket anana agia liasü. Suzerain CC-i over 18.3 nung wicket pezü dang agidakja runs 109 angu aser wicket 6 agi Zero Boys CC madak takok angu.
Tanabuba asaya nung Rainbow CC-i Jovial CC madak wicket 7 agi takok ngua liasü. Jovial teloki toss akok aser mezüng batting asütsü shimtet saka par telok tetenzüklen junga masayatetba ajanga mezüng over 6 nung runs 20 dang agitet aser wicket 6 agidaktsü, saka tsünglanglen alir batsmen Moalemba (19 runs) aser Odiyanger (16 runs) ajanga runs 83 tashi bener atu aser wicket 9 agidaktsü.
Rainbow CC nungi Viza-i over pezü nung runs 9 dang agütsü aser wicket pezü (hat trick ka) agia liasü. Rainbow CC wicket 3 tokoa over 13.5 nung runs 84 nguteta liasü. Talikaba-i out mesüi runs 43 angu aser Asemba-ia runs 20 ngua liasü.
Jovial telok nungi Odilema-i over 3.5 nung runs 15 agütsü aser wicket asemprong agia liasü.
Iba asaya akokba ajanga Rainbow CC Quarter final-i ayir aser Jovial teloki tatemsabuba league asayatsü anünga lir saka iba match akokyonga par telok Quarter final-i matutsü.
Asüng asayatsüpurtem:
8:00 AM – Brotherhood CC v/s Sovran Kings CC
11:00 AM – Titans CC v/s DC XI