MDCA T20:Brotherhood CC aser Titans CC telok nati akok

Mokokchung, January 12 (TYO) : Tang Imkongmeren Sports complex nung tasayadak aliba MDCA Inter Club T20 Cricket asayamung ti nü asaya nung Brihostibarnü Brotherhood CC aser Sovran Kings na aser Titans CC aser DC XI na tsüngda asaya liasü.
Mezüng asaya nung Brotherhood CC-i toss koker mezüng bat asütsü shimtet aser over 20 nung parnoki nisung 4 tang out ser runs 161 yanglua yutsü.
Par telok nungi Chubaodangi run timba yanglu, pai run 50 aser Daniel Rai-i run 45 yanglua liasü. Sovran Kings nungi Lisosungkumi over pezü aonba mapang runs 20 agütsü aser wicket 2 agi. Ano Sademmeren-i over pezü aondang runs 30 agütsü aser wicket ka agi.
Sovran King-i runs 161 ajatettsü meranga asayatsü tenzük ajisüaka parnoki over 17.5 nung runs 74 ang yangluteter lia parnok ajak out asüba janga Brotherhood CC-i runs 68 agi parnok madak takok angu.
Sovran Kings atema runs timtiba yanglusangji Maset liasü, pai runs 34 yanglu aser pa sülen Yutsüngbai runs 16 yangluteta liasü.
Brotherhood CC nungi bowler Aosashi-i ball kanga junga aoba agi pai over 4 aondang runs 13 ang agütsü saka wicket 3 tashi agi aser ano Temsütoshi-ia over 4 aondang runs 34 agütsü aser wicket 3 agi.
Tanü iba takok anguba ajanga Brotherhood CC ya tanga club tang nungi finals timba tongteter aser asaya timba akoker telok küma tan asayamung mezüng knockout asaya tongteter telok kümogo.
Tanabuba asaya nung yaküm takok ngua alir Titans CC-i runs 91 agi DC XI madak takok angu.
Titans CC mezüng bat asü aser parnoki over 20 nung nisung 5 out ser runs 174 yangluteta yutsü.
Tan asayamung nung runs timtiba yanglubaji par teloki yangluba lir. Akumdong-i runs 73 yanglu aser ibaji tan asayamung nung nisung kati yangluba runs timtiba lir. Pa sülen Resemdong-i runs 31 yanglu.
DC XI nungi Daniel-i over 4 aonba mapang runs 26 agütsü aser wicket ana agi. Ano Meren, Noksen aser Sachin nungeria wicket kaka agi.
Titans CC teloki yanglua yutsüba runs meneptsü meranga asayadang DC XI-i over 17.2 nung nisung ajak out ser runs 84 ang yangluteta liasü. Titan nungi bowlertemi opener tem karakara out südaktsüba agi DC XI-i runs aika meyanglutet. DC XI nungi Throngdi runs 29 aser Merenbai runs 13 yanglua liasü.
Iba asayamung indang marok asemben tashi atonga atonga bena aliba telok, Titans-i tanü asaya runs 91 agi akok aser January 17, 2017 nü nungi tenzüka asayatsü aliba Quarter Final tongtetogo.
Titans CC nungi Longsasunep-i ball tajungba aon, pai over 4 nung runs 6 tang agütsü saka wicket bo 3 tashi agi. Chubamaong aser Toshimeren natia wicket anana agi. January 13, 2017 nü asaya mapang tera melenshiba yamai metetdaktsür:-
Anepdang 8:00 ako – Zero Boys Vs Zungamedem
Anepdang 11:00 ako – Sovran CC Vs ADC Tuli Xi