MDCVOA-i khenpika atema lungkak aitba anena atar

Mokokchung, Oct 23 (TYO): Vahan 4.0 system onük dak sentakba nung Mokokchung District Commercial Vehicle Owners Association (MDCVOA)-i parnok taginüba mataloktsüba asoshi tejashiba sayua Mokokchung district nung commercial gari kata mesenzüdaktsütsü asoshi Oct 21 nungi koba bandh ayonga aruogo, ibaji khenpika atema anena atar, ta MDCVOA ketdangpurtemi osangbener senden ka nung metetdaktsü.
Parnokisa iba bandh anena ataba kuli ashidang, Oct 23 nü district administration-i ayonga Mokokchung D.C office nung MDCVOA den mensem ka amen aser iba senden nungji administrator-i anir Ao Senden, Mokokchung Town Aor Telungjem, All Ward Union Mokokchung ajanga tang “Naga yimden tebilemtsü (Naga political issue) asoshi ken o tejembidak alinung, mapang tatsüka atema bandh-ji anena atatsü mepishiba den administration aser RTO office ajanga MDCVOA taginübaji higher authority den jembitsütsü ta nangzük nung, MDCVOA-i mapang tatsüka atema bandh-ji suspend süa atatsü lemtet”, ta metetdaktsü.
Aji saka, “MDCVOA-i Vahan 4.0 system anema koba concerned department dangi July 16, 2019 aser September 3, 2019 nü takangba agütsüogo, iba nungji onok masetshii lir”, ta parnokisa jangjashitsü.
Oct 21 anepdang 6:00 nungi tenzüka MDCVOA-i bandh ayongba mapang nüburtemi amalitepba den ano Tuensang, Zunheboto, Longleng, Noklak, Peren, Phek district-temia iba bandh nung yaritepba asoshi ajak dang pelaba MDCVOA ketdangpurisa lemsatepa liasü.
Mokokchung District Commercial Vehicle Owners Association (MDCVOA) kübok ya Taxi Association, Truck Union, Bus Union aser Pick-Up union nungertem dena lir. MDCVOA-i Vahan 4.0 System anema Oct 21 anepdang 6:00 ako nungi Oct 23 tashi Mokokchung district nung commercial gari kata mesendaktsüi lungkak aitta liasü.