MDFA 2016: Shitilong SA-i semifinal asayatsü jenjang angu

Tang Mokokchung nung tasayadak MDFA Trophy 2016 asayamong tasembuba quarterfinal asaya nung Shitilong SA asayar, Khethozhaphu (Noksa nungbo mangur)-i goal 1 agüja, par telok Mongsenbai YSC telok den kasa jenjang kümdaktsüba noksa nung angur. Shitilong teloki goal 2-1 agi tanü asaya akokba sülen semifinal asayatsü jenjang ngua liasü. (Mokokchung, October 18)

Mokokchung, Oct. 18 (TYO): MDFA Trophy 2015 nung tanabuba jenjang angur telok, Shitilong SA-i goal 2-1 agi Mongsenbai Youngsterz telok tasembuba quarterfinal asaya nung tsükdakja, tang tasayadak MDFA Trophy 2016 asayamong semifinal-i tanü, Mongolbar nü iogo.
Mongsenbai striker, Khriekethzo-i asaya tenzüker minute 15 nung goal agütsüba ajanga tan asayamong nung telok tajung rong nung adener, Shitilong teloki asaya mezüngbuba shilem nung tekübokba jenjang ngua asaya.
Ajisüaka, asaya tanabuba shilem nung, asaya tenzüker minute 48 buba nung Shitilong asayar, Kheto-i metsüoktsüba corner ball agizüka, par defender, Khethozhaphu-i pa tekolak agi tongokja goal 1 agütsüba ajanga par telok anaprongla kasa jenjang aküm.
Yamaji asayar külen Supongmar-i minute 61 buba nung 2 buba aser takokba goal agüja, par Shitilong telok nem takok ngudaktsü.
Ano külen, Fusion FC aser Arikodong Club telok nati tan October ita 18 nikongtsütsü 1:30 ako nungi tenzüka, 4 buba quarterfinal asayatsü renema lir.