MDFA Asayamung: Super Vene o Moanungsang MSC na quarter final-i igo

Super Vene o Y/A Marepkong na tsüngda asayaba mapang tangokba noksa nung angur. Mokokchung, Oct 18, 2019.

Mokokchung, Oct 18 (TYO): Oct 18 nü MDFA trophy yangi Imkongmeren Sports Complex Mokokchung nung mezüng asaya Super Vene o Y/A Marepkong na asayaba, Super Vene-i goal 2-1 agi Marepkong pur tsükdakja parnok Pool ‘A’ nungi tanabuba jenjang (runner up) nung quarter final-i igo.
Tanabuba asaya Pool ‘C’ nungi Moanungsang MSC aser NUSU F/T na asayaba shingaia goal kata magütsüteti kasasa (draw) nung atem, ajisüaka, Moanungsang MSC puri taoba asayatem nung goal teimba agüja aliba ajanga parnoka par Pool nungi tanabuba jenjang (runner up) nung quarter final-i air.
Mezüng asaya nung Marepkong nungi Merenlemba (J/No. 8)-i par telok asoshi mezüng goal-ji minute 28 nung idaktsü. Ajisüaka, kopi melii Super Vene nungi Suponglemba (J/No. 8)-i minute 35 nung aser Meyisemba (J/No. 10)-i minute 38 nung goal kaka agüja iba asaya Super Vene-i 2-1 agi akok.
Tanabuba asaya, Moanungsang MSC o NUSU F/T na asayaba, tenapronglai goal yoktsü aiben merangaka maongka munguteti iba asaya kasasa nung shingaia mekoki tembang. Taoba asayatem nung Moanungsang MSC-i NUSU dang nungi goal tera teimba agüja aliba ajanga parnok quarter final asayatsü maongka nguogo.
October 19 nü league match tatembangbuba Sungkomen F/C o SSS Blue na tsüngda nikongdang 1:00 ako nungi tenzüka asayatsü.