MDFA final October 23 nü asayatsü

Mokokchung, October 21 (TYO): Tanü tsüngsang majungba ajanga MDFA Trophy 2017 final asaya October 23, 2017 nü-i belener atuba Mokokchung District Football Association (MDFA)-i metetdaktsüogo.
Zonipang S/C aser Y/D Marepkong na tsüngda final asaya ya Imkongmeren Sports Complex nung anepdang 7:00 ako nungi tenzüktsü. Tzüsü kanga melema aliba aser tzünglu sashia aruba ajanga final masayatettsüsa aküm, aser iba atema MDFA-i sasaa bilemba lemsatep.
Final masayatetaka asayamung tatembangbuba sentongbo agiogo, aser iba nung Parliamentary Secretary Labour & Employment, Skill Development & Enterpreneurship Dr Neiphrezo Keditsu tongti tesemdangea liasü.
Dr Keditsu-i ashiba agi, football ya Naga nunger atema, talisa Aoer tem atema kibok nüngja ka kümogo, shirnoki Olympian aser mezüngbuba Indian Football Captain T Ao adokdaktsü. Paisa MDFA ngutetertem tenüng asang shirnoki MDFA silver Jubilee tashi mungtettsüsa anir aru.
Paisa ashiba agi Naga nunger dak sempetbo lir saka temaba jenjang metongteter, kechiyong asenoki asaya ka nung dang temolung agütsür asayar masü saka asaya ajak nung shilem agitsü meranger.
Maneni pai asayartem dang asaya akoktsübaji tongtibang saka nüburtem temolung akoktsübaji tongtibangtiba lir, ta ajungshiba den parnok dang sports ambassador ka küma yimjung aser telungjem terenlok atema inyaktsü asoshi mepishi.