MDFA: Fusion nungi Nyithang & OCYU nungi Imnasashi nati hat trick yanglu

Mokokchung, Oct 6 (TYO): Oct. 6 nü mezüng asaya Fusion S/C o Y/A Marepkong na yangi Imkongmeren Sports Complex Mokokchung nung asayaba Fusion-i goal 7-0 agi Marepkong pur ayongayonga akok.
Tanü Fusion SC nungi jersey No. 19 Nyithang-i kanga junga asaya pai par telok asoshi goal 5 agüja hat trick agi. Pai minute 12, 15, 20, 21 & 57 nung goal punguji idakja tang asayamung nung goal timtiba agütsür kümogo. Ano par Fusion telok nungisa Jersey No. 9 T. Meren Jamiria minute 47 aser 49 nung goal kaka agüja Marepkong telok madak takok tulu angu.
Tanabuba asaya Hills XI F/C aser Tongdenyong S/C na asayaba Hills XI-i goal 4-0 agi akok. Hills nungi Jersey No. 21 Imtimeren, Jersey No. 9 Imtinükshi, Jersey No. 8 Imlitoshi aser Jersey No. 11 Temsüchuba par pezüi minute 5, 9, 32 aser 60 nung goal kaka metsüoktsü. Tongdenyong telokia kanga meranga asaya saka parnoki goal kata meküpdoktet.
Tasembuba asaya nung Socianian F/C o Alempang Y/A na asayaba Socianian teloki goal 3-1 agi akok. Socianian telok nungi Jersey No. 11 Arennungsangi asaya tenzüker minute 16 nung goal ka yok aser par telok nungisa Jersey No. 12 Lipoktoshii mezüng asaya tesadang atemtsü lia minute 35 nung goal ka idaktsü.
Tanabuba asaya tesadang nung Socianian telok nungi asayar kati penalty mena. Iba penalty-ji Alempang Y/A nungi jersey no. 8 Tayongbai maongka agia metsüoktsü. Iba penalty metsübaji minute 46 nung liasü. Aji sür, ano Socianian nungi Jersey No. 15 Imrongwatii par telok asoshi minute 58 nung goal ka idakja Alempang madak takok ngua liasü.
Pezübuba asaya nung OCYU aser Mongsenbai Youngsterz F/C na asayaba OCYU-i goal 4-0 agi akok. Iba asaya nung OCYU nungi Jersey No. 10 Imnasashii kanga junga asaya aser pai minute 4, 31 aser 43 nung goal asem agüja paia hat trick agia liasü. Iba den par telok nungisa Jersey No. 7 Sashikokbaia tanabuba asaya tesadang tenzüker minute 48 nung goal ka idakja takok tulu angu.
League round asaya Oct 7 nungibo anüngdang 12:00 ako nungi dang tenzüktsü. Mezüng asaya Elation S/A o Mongolian United FC, tanabuba asayaDilong Y/A o Tongpang Ruju Club aser tasembuba asayaji Tongdenyong SC o Grasshoopers na kasa Imkongmeren Sports Complex tesem nung asayatsü renema lir.