MDFA-i ayongba ‘free football clinic-cum-talent hunt’ sentong tembangogo

Mokokchung, January 27 (TYO): Mokokchung nung Mokokchung District Football Association (MDFA) hopta ana atema arishi küm 15 nungi teküboklen tanurtem (U-15), football asayatsü jangrartem nem angati ‘football clinic’ aser tesayuba balala agütsüba ayongba sentong tanü, Hokolbarnü tembangogo. Iba sentong nung arua shilem agir lanurtem aika dak sempet tajung ajitetba osang ka MDFA-i metetdaktsüogo.
Mokokchung nung U-15 tanurtem football asayatsü jangrartem bushia, item tanurtem nem football asayatsü asoshi tesayuba angati agütsüba ya MDFA-i kümnabuba ayonga amunger.
Taküm küm iba sentong nung tanur tebur 40 arua shilem agia liasü. Iba sentong nung shilem agir rongnung tanubutiba ji arishi küm 9 liasü.
MDFA ajanga football asayar tejen nübu anir arua iba tesayuba agütsü. Iba sentong nung coach, Lanunukshi, Nungsangyanger, Kora walling aser L Achi nungertem liasü.
Iba sentong tembanga tanurtem exhibition match minute 90 asayadaktsü aser iba sentong nung shilem agirtem ajak nem MDFA ajanga kuli kaket aser sempet balala agütsü.
“Iba sentong nung asayaba ama tanurtemi maneni asaya aonungbo, tarutsü nung parnok dak nükla tajung lir. MDFA ajanga iba ama tesayuba sentong maneni June ita nung ayonga akatsü sentong yangludar,” ta MDFA Tournament Secretary, Supongwati-i osangbener dang ashi.
Taküm küm sa MDFA ajanga Inter-school football tournament mesüra Under-15 Inter-club tournament ka ayongzüktsü sentong lir, ta paisa shisem.
Pai, MDFA-i iba ama sentong tajung takokma nung ayongzükba asoshi pelaba shisem aser coach tem, tsürabur, football meimer aser iba sentong nung shilem agir ajakdang pelar, ta maneni shisem.