MDFA-i U-14 asayartem nem angati football tesayuba agütsütsü

Mokokchung, June 15 (TYO): Mokokchung District Football Association (MDFA)-i ayonger külen tan June 22 nü nungi tenzüka taruba July ita 2 nü tashi arishi küm 14 ser tekübok (Under-14) tebur chanutem nem football asayatsü tesayuba Mokokchung kübok Imkongmeren Sports Complex nung angati agi agütsütsü renemba osang ka MDFA Tournament Secretary, Supongwati-i tanü sandong ka ajanga metetdaktsüogo.
Iba tesayuba sentong nung shilem agitsü atema tenüng züluoktsü aser tetemtsüpur shimtsü sentonga Imkongmeren Sports Complex nungsa tan June ita 23 nikongdang 2:00 ako nungi tenzüka agitsü sentong lir.
“Tan ayongba sentong nung shilem agitsü jangrartem ajunga 2001 küm December ita 31 nü ser tejaklen anogotem nung asor alitsüla aser parnoki sorkari agütsüba tasoba kulikaket den tawa color nung tangokba passport noksa kaka bener arutsüla,” ta Supongwati-i osang jangjashitsü.
“Iba sentong nung shilem agitsü atema shimtetba asayartemi pei meyong asayatsü osettsüset tesayuba agütsüdak bener arutsü metetdaktsür,” ta paisa ashi.
Iba football asayatsü tesayuba agütsütsü mapatong den sentakba osangtsüsang tali jangjashitsü jangrartemi phone no. 9856-699-423 ajanga tongteprateptsü asoshi sangdong ajangasa metetdaktsü.