MDFA tanaben asayatsü melaogo; October 24 nü semifinal asayatsü

Mokokchung, October 22 (TYO): Mokokchung nung ayongba MDFA Trophy 2016 tanaben asayatsü melaba sülen anendaka aliba semifinal asaya tan October 24 nü asayatsü renemogo.
Sports Society Suyim (SSS) & Dilong Youth Association (DYA) na tsüngda 1 buba semifinal asaya anepdang 9:00 ako nungi tenzüka asayatsü aser Fusion FC & Shitilong SA na tsüngda 2 buba semifinal asaya 12:00 ako nungi tenzüka asayatsü renemba osang ka MDFA-i tanü sangdong ka ajanga metetdaktsüogo.
Asaya kar nung mangatettep adoka, mepetmesü tia ajuruba sülen Mokokchung district sorkari MDFA asayamong tan Hokolbar nü anentsü saka asayamong tayonger o district sorkar na angatettepba sülen tan asayamong maneni asayatsü renemshia liasü.
Ano külen, MDFA-i tan asayamong semifinal asayatsü jenjang ajangzüka alir telok 4 prongla den rongdak senden ka amenba sülen MDFA asayamong temzüng ozüng metetdaktsü aser telok 4 nungi coach aser manager-temi kasaji agizüka benshitsü nangzüktep.
Tan MDFA asayamong takokba nung tembangdaktsütsüa asaya repranger aser telok balala pusmertemia timtesü agi asaya reprangtsü aser pei telok pusemtsü tayongzükba ka MDFA-i kasa sangdong ajanga metetdaktsüogo.