MDFA Trophy 2016 asayamong anentsüba atema sasar: MDFA

Mokokchung, October 21 (TYO): Mokokchung district sorkari Mokokchung nung tasayadak Mokokchung District Football Association (MDFA) Trophy 2016 football asayamong ajungbena anendaktsüba atema sasaba olen ka Supongwati, Tournament Secretary aser Aodangnok, Convener, Organizing Committee nati MDFA aser Organizing Committee, MDFA 2016 tenüng nung tanü sangdong ka ajanga metetdaktsüogo.
MDFA asayamong asayaba ajanga Mokokchung district tesepti nung tensa mejungi kümdaktsüba ken o nung ajemdaker Mokokchung sorkari Fusion SC aser Shitilong SA na tsüngda MDFA asayamong tanabuba semifinal asaya tasayadak mapang asayamong anenja liasü.
“Mokokchung sorkari mapang jilia MDFA mesüra tayonger luden den tongtepratep mesüi, tan ajungbena asayamong tasayadak mapang asayamong anentsübaji taoksatsü aser tim masüba inyakyim lir,” ta Supongwati o Aodangnok nati sangdong ajanga metetdaktsü.
“Mokokchung district nung football jenjang tajungba kümdaktsütsü aser sempet akar lanurtem nem toktepa shilem agitsü sabang lapoktsütsü nükjidong nung MDFA-i ayongba asayamong nung Mokokchung jila nungi dang masü saka Mokokchung district tesem ajunga nungi asayatsü teloktemi shilem agir,” ta tenati osang jangjashitsü.
Tan asayamong 1 buba semifinal asaya nung referee-i aibelenba ajanga Sports Society Suyim (SSS) aser Dilong Youth Association (DYA) nati par asaya tembanga masayatet saka referee-sang anentsüba sülen mangatettep adokba teloktem rong nung tangatettep kati arur par asaya tan October ita 22 nü asayatsü asoshi latetshia lir.
“Angatettepba sülena Mokokchung sorkari ajungbena asayamong anentsüba ajanga MDFA tentet yirutsüogo kechiyong MDFA asayamong ayongba ajanga Mokokchung nung tensa majungtsüsa tia bener aruja mali,” ta tenati shisem.
“Taoba mapang ayongba asayamong ajunga nung sorkari MDFA den yaritepa aruogo aser iba asayamong ya Deputy Commissioner lenisüba kübok Mokokchung District Sports Council temelaba kübok ayonga asayar. Anungji, sorkari kechi tajangzük angutsü nükjidong nung tan asayamong anentsü iba osang jangjashitsütsü akhanger,” ta shia, iba den sentakba nung MDFA asayamong nung tongti shilem agirtemi senden mena, tarutsü mera agitsü telemtetba agitsü renemba olen ka sangdong ajanga metetdaktsü.
Ano, tan mepetmesü ajurua, asayamong masayatettsüa akümba ajanga asaya reprangertem nem timtem bener arutsüba atema sasaba olen ka sangdong ajangasa metetdakja liasü.