MDFA trophy 2018 tanü nungi tenzükogo

Imkongmeren Sports Complex, Mokokchung nung tanü Advisor YR&S Er Zale Nekha, den DFA ketdangsertem aser Kumlong Sporting Association (White) o OCYU nung asayartem asaya metenzüktsüngda tangokba noksa nung angur.

Mokokchung, Mongputeni/October 9 (TYO): MDFA Trophy 2018 tanü Imkongmeren Sports Complex nung tenzükogo. Asayamung lapokba sentong nung Advisor Youth Resources & Sports, Government of Nagaland, Er. Zale Nekha tetushi tesemdanger ama arua aden.
Taküm iba asayamung nung club 17-i shilem agitsü.
Asayamung lapokba sentong nung o jembidang Er. Zale Nekha-i, Dr. T. Ao-i ajangtetba tem tenüng asangba den PDA sorkari Dr. T. Ao sor küm 100 ajungba nüngtem nung sentong balala ayonga akaba lemsatepa liasü.
Paisa sorkari saisapong dak sendakba nung infrastructure tem nung terenlok bener arutsü asoshi rangloker inyakdar ta ashiba den lanur asayartem ajungshia liasü.
Tetushi tesemdangeri Nagaland Sports policy metetdaktsüba den asayartem national aser international jenjang nung takok tajung angurtem aser national aser international asayamung balala nung medal angurtem atema mapa wazüka tokja aliba metetdaktsü.
Zale Nekha-isa Naga nunger ya saisapong nung tangar dang nung teküpokba masü, saka training shidak magütsüba aser asayar yimya tim mebenshiba ajanga jenjang temaba nung takok asoshi nükjidong ayur masü saka takok tilala ajanga temulung sür alir, ta ashi.
Asayamung lapokba sentong nung MDFA organising committee, Convenor, S. Bendang Aier-i lokti pelaa agizükba o jembia liasü.
Tanü asaya mezüngbuba nung Kimlong SA aser OCYU na goal 1-1 agi draw asü.
Asayamung mezüngbuba asaya telok anapronglai kangajunga asayaa tenzük aser asaya mezüngbuba shilem tembangba tashi nung telok katidanga goal magütsütet. Iba sülen asaya tanabuba shilem nung OCYU nungi asayar Moazului minute 47 buba nung mezüngbuba goal idaktsü saka Kumlong SA nungi asayar Imnatoshi minute 59buba nung goal ka idakja asaya draw nung tembang. Asaya nung OCYU nungi asayar Moasanen nem asayamung mezüngbuba yellow card agütsü.
Mongputeni/Oct 10 nü asaya yamai alitsü:
Mapang 11:00 ako
* 1buba asaya – NU Lumami Vs Mosiac
* 2buba asaya – Unicorn FC Vs SSS Blue
* 3buba asaya – Zonipang S/A Vs Y/A Marepkong Club