MDFA Trophy osang: Zonipang S/A pur final-i igo ; Oct 24 nü 2nd semi-final Telongjem o Alempang na asayatsü

Oct 23 nü MDFA asayamung yangi Imkongmeren Sports Complex nung mezüng semi-final Zonipang S/A o Intermingle Club na asayaba mapang asayar ana ball raktepba noksa nung angur. Mokokchung, October 23, 2019 (Photo: Sashimeren Jamir)   

Mokokchung, Oct 23 (TYO): 2019 MDFA asayamung yangi Imkongmeren Sports Complex Mokokchung nung mezüng semi-final match Oct 23 nü Zonipang S/A aser yaküm champion Intermingle Club na tsüngda asayaba, Zonipang-i goal 2-1 agi Intermingle pur tsükdakja final-i igo.
Tanü iba asaya nung mezüng asaya tesadang minute 45 asayaba tashi nung shingaia goal kata magütsüteti kasasa nung atem. 1st half asayaba tashi nung Intermingle o Zonipang naprongi corner pezüben-pezüben metsütsü maongka angu aser goal post (target) tsütsü metsübajia kasasa dang liasü.
Asayartem anisüngzüker külen asayadang, Intermingle-i mezüng goal ka agütsü aser ibaji striker J/No. 7 – Hanglem-i minute 51 nung metsüoktsü. Zonipang pur teimla mesamai kanga meranga asaya arur parnokia minute 57 nung J/No. 18 midfielder Suponglembai goal kaji küptok, iba goal idaktsüdang Zonipang telok asemertem tesüngmangtsüka ola tulu adoka jokdena pelatep.
Aji sür, ano kopi melii Zonipang nungi striker J/No. 10 – Retso Mero-i goal ka 63 minute nung metsüoktsü aser ball-ji par medemer midfielder kadi meta talang nungi ball tajung ka yanglutsü aser iba ball-ji Retso kisüngi D-Box telunglen Intermingle pur defender-tem ajangdanga bener ir metsüoktsü. Intermingle-ia iba goal-ji küptoktoktsü kanga merang saka tia majung parnoki meküptokteti iba asaya Zonipangi 2-1 agi koka liasü.
2nd half nung Intermingle-i corner pezüben metsütsü maongka angu aser Zonipangi asemben dang metsü. Intermingle-i target nung metsübaji anaben aser Zonipangi asemben ta metsüa liasü. Iba asaya nung Intermingle nungi J/No. 16 – Wapongtemjen, J/No 6- Imsuwapang aser par telok nungisa J/No. 10 – Ratobe Zeliang parnoki timi masayaba ajanga referee-i yellow card agütsü.
Oct 24 nü 2nd semi-final match Telongjem F/C o Alempang Y/A na nikongdang 1:00 ako nungi tenzüka asayatsü. League asayaba tashi nung Telongjem F/C aser Alempang Y/A na ya ka Pool ‘D’ aser ka Pool ‘B’ nungi takoker lir.