MDLSA-i Mkg nung temzüng ozüng meteta alitsü indang osang perok

Mokokchung, November 03 (TYO): Nagaland State Legal Services Authority (NSLSA) tetuyuba nung Mokokchung District Legal Services Authority (MDLSA)-i ayongzüka Nov 2 & 3 anogo ananü Mokokchung town aser temeket yimtsüngtem nung linük temzüng ozüng dak sentakba nung metetyim kar yimya balala nung osang proka jajaogo.
Tongtibangsa India temzüng kübok lijaliyonger temeden, gari dak sentakba ozüng, Lok Adalats, Cyber ozüng, nübur aliba tesem nung moko machitsü renemba ozüng, merangpong ozüng (1959), mapa inyakertem temenok ozüng, tanur temeden aser free & compulsory education act (2009), fundamental duties indang, tetsür temeden aser Nagaland State Legal Services Authority indang temetettsütem, ta item onük nungji nüburtem nem yimya balala nung tesayuba agüja liasü.
Anogo ananü aliba mapang Mokokchung District Legal Services Authority ketdangsertemi Mokokchung nung police station, judicial branch, Dobashi court, town tiyong nung oli orartem, driver-tem aser kidang tsüngdong oa nüburtem den temzüng ozüng dak sentakba onük nung sensaksemba den tongtibang kaket kar angati agüja liasü, ta osang ajanga metetdaktsü.
Pei temeden metetba den nübur azüoktsü asoshi koba temzüng ozüng lateta kar, senso tajung ka ama itemjia tashi angaa benshitsübaji kanga tongtibang lir. Iba ama sentong ayongba ajanga nüburtem rongnung, talisa temzüng ozüng tsütsü tali meteta akümtsü imlar, ta senso kati iba osangbener den jembidang lemsatep.