MDMAA-i ayongba Free Coaching Camp takok ngua tembangogo

Mokokchung, October 10 (TYO): Mokochung District Martial Art Association (MDMAA)-i Self Defense & Health Awarness nüngtem nung taoba September ita 28 nü nungi ayonga agiba Free Coaching Camp sentong Mokokchung kübok Multipurpose Sports Complex nung tanü Honibar nü tembangogo.
Mokokchung nung tan mezüngsüa ayongba sentong nung school balala nungi shilem agir kaketshir 179 tashi nem tayongeri kuli kaket agüja liasü.
Tan sentong nung tesayur 9 tashi kaketshirtem nem Taekwondo, New Kung-fu, Inside Kung-fu, Karate, Bodokan, International Muay-Thai, Kick Boxing, Shodokan Karate tesayuba balala hopta ana tashi agütsür lir.
Ano, MDMAA tentetter küm 25 sangküm 2016 küm ajungba nüngtem nung par teloki Open State Martial Championship tetoktepba sentong sangküm nungi tenzüka kümshi ayongtsü sentong renemba osang angazükogo.
“Asen tanurtem rong nung sempet tajung akar jenti lir aser parnok nem tesayuba tajung agütsüra, parnoki national aser international jenjang nung tangar den toktepa shilem agitettsü. Anungji, parnok sayutetba ajanga asen lima nungia international sabang nung gold medal agizüker adokdaktsütettsü imlar,” ta MDMAA züngsem kati tesülen metetdaktsü.
Tanü sentong shibangba sentong nung 25 NI Coy NCC Mokokchung Lt. Col. V Srinivas-i tetushi tesemdanger ama shilem agia liasü.